İron və dınyoədə Ğuds beynəl xalğə ruji yolə aksiya.

Zinə mubarək ruje manqi oxonə cumə ruji həmzəman Ğuds beynəl xalğə ruji yolə aksiya İron və İroni hamsoyə kişvəron əcumlə Tacikiston, Pakiston, Əfğanıston, Hindıston, İrağ və Bəhreynədə bərpo be.

İroni prezident Həsən Ruhani zinə həmzəman Ğuds beynəl xalğ ruji mınosibəti bə Məkkədə bıə islamiyə liqa təşkilati iclosədə iştirokəkəyon xətob votışe: ğərni muğavilə Fələstin ozod məhv karde xoto iyən sionist rejimi bə həmmə islamiyə kişvəron təcavuz karde plane ki bəpe çəy vədə bemandən.

Həsən Ruhani təkidış karde: ğərni muğavilə plani hozzo əkəyon sionist rejimi işğal siyasəton bənav barde pidəşone.

Zinə ijən Tehronədə Ğuds beynəl xalğə ruji cərəyonədə İroni xarıci vəzir Muhəmməd Cəvad Zərif votışe: Şərifə Ğuds çı Amerkə sərzəmin ni ki əy bə sionist rejim bıdə ya xot sionist rejim çəy bardə iddeoş bıbu bəlkəm Ğuds çı mısılmonon və Fələstin milləti sərzəmine.

İroni Yolə Rəhbəri mışovir Əli Əkbər Velayəti həm zinə aksiyadə bə əsri muğavilə məğlubiyəti nışonəon oşko bey işorəş ka.

Zinə Ğom şəhri yolə aksiyadə həm Əhle Beyt Esmət və Təharət(ə) beynəl xalğ icma rəis Ayət Muhəmməd Həsən Əxtəri bə ğərni muğavilə hədəfon əcumlə sioniston məskon karde, Fələstin avarəon oqarde vəy qəte və ıştə sərzəminiku Fələstinıjon ixroc karde ijən sionist rejimi ziyod tələbion hevujəkə muğəddəmə işorəş karde.

İroni sepah təşkilati fərmondəon əcumlə qeneralMuhəmməd Əli Cəfəri, qeneral Əmir Əli Hocizodə iyən qeneral Ğolam Husein Ğeybpərvər həm zinə yolə aksiya cərəyonədə bə İroni milləti hərorətinə iştiroki əhəmiyyət işorəşon karde və Amerkə tərəfo ğərni muğavilə hizzi bıə plani hukmən məğlub bıə plan hisobışon karde.

Suriyədə İroni səfir Cəvad Turk Abadi həm Dəməşğədə Ğuds beynəl xalğə ruji mərasimədə şərifə Ğudsi çı dınyo mısılmonon vəhdəti simvol hisobış karde.

Tehroni zinə cumə nımoji xətib Huccətul İslam Kazım Seddiği həm Tehroni cumə nımoji xotbəonədə bə muğavimət cəhbə zumandəti işorəş karde və votışe ım muğavimət ısət sionist rejim, Amerkə, Ərəbiston və İ Bıə Ərəb Əmiron tars və norohtəti bois be.

Əv harcurnə plani ki Fələstin milləti avarəon iyən şəhrvandon həx-huğuği poymoləkə bıbu ım sərzəmini bıhrani həl nıkarde amil zınəş be.

Zinə Tehroni cumə nımoji xotbəon bənav həm İroni islamiyə şura məclesi rəis Əli Laricani ğərni muğavilə icra karde xərci çı Fars Dıyo ərəbə kişvəron cifiku zınəş be və votışe: Beytul Muğəddəs çı mısılmonon iminə ğeblə be və yəğin çı Fələstin sərzəmini i baxş bə mande.

İronədə Həmas təşkilati nımoyəndə Naser Əboşərif həm zinə təkidış karde ki Beytul Muğəddəs və Məçidul Əğsa hoatənin ni.