İraği i minə vəziri vıjniye barədə İroni rizoyət.

İroni xarıci vəzarətxonə sıxənəvot votışe: İrağədə demokratiya pronsipon, ərazi təmamiyyət, milli hakımiyət iyən istiğloliku himoyədorəti karde xoto İron ım kişvəri tojə i minə vəzir Muhəmməd Tofiğ Əlavi vıjniyəku ıştə rizoyəti elanış karde.

Seyed Əbbas Musəvi ijən təkidış karde: hukmən tojə i minə vəzir karde bəzne de tojə dıvləti təşkil doe iyən millət və mərcə təğlidon tələbon çərçivədə məntəğədə qıləy zumand iyən stabilə İraği bə vırə rosniyə xoto cəhd ko.

Musəvi votışe: İron ısətnə həssasə şərayetədə həm deştə həmmə zərfiyyəton bə İraği dıvlət və milləti komək kardero ijən hozzo mandedə.

İraği prezident, Bərhəm Saleh zinə İraği nakonə i minə vəzir Adil Əbdulməhdi istefa doeku 2 manq bəpeştə qıləy təklif doe bıə 5 nəfəriyə siyahiku Muhəmməd Tofiğ Əlavi bənə i minə vəzir iyən dıvləti kabineti təyinəkə şəxsi elanış karde.

İraği nako i minə vəzir Adil Əbdulməhdi həm rəsmən Muhəmməd Tofiğ Əlaviku himoyədortiş karde.

Xəbə ome, İraği sədr cərəyani rəis Muğtəda Sədr həm ım vıjniyə və intixabi bo İraği siyahi tale zumandətiro qıləy mınosibə hərəkət zınəş be.