Suriyədə ərtışi muvəffəğə əməliyaton dəvom kardedə.

İdleb ostani ətrofədə Suriyə hərbiçiyon muvəffəğə əməliyaton dəvomədə Mərrətuleyn məntəğə həm terroriston işğaliku xilos be.

Bə Mehr aqentiyəti raporti əsos, Suriyə ərtış ım əməliyatədə çandə çı Cebhətol Nusrə terroriston həlok ya xot zəxminış karde.

Zinə həm İdlebədə 3 qılə di terroriston işğaliku ozod be.

Isət de Suriyə ərtış və muğavimət qrupon muvəffəğə əməliyaton dəvom, har ruj Edleb ostanədə di iyən məntəğəon terroriston dastiku ozod kardey barədə xəbəon muntəşir bıdə.

Əmmo xəbə ome ki İdlebədə Suriyə və Tırkiyə hərbion miyono daveon nəticədə 5 nəfər çı Tırkiyə hərbiçiyon həlok bin.

Im məsələ məvuji çı Tırkiyə rəsmi şəxson ğeyzinış karde. Xəbə ome ki Tırkiyə prezident aparati sıxənəvot İbrahim Kalin ijən Suriyəş təhdid karde.

Əv votışe: detosə təyin bıə zəmini, Suriyə hərbion bəpe İdlebiku xaric bıbun.

Tırkiyə təhdidon qıləy şərayetədəy ki Ankara qıləy be ğanunə siyasəti çərçivədə Suriyəş işğal karde.