İron çı İraği silohinə ğıvvon ehtiyoci təmin karde bəzne.

İroni mudafiyə vəzir votışe: mudafiyə baxşədə bə Bəğdad komək kardeyro İron İslam Respublika çı İraği silohinə ğıvvon ehtiyoci təmin karde bəzne.

Qeneral Əmir Hatəmi zinə Tehronədə de İraği mudafiyə vəzir Cumə Ənad Səədon vindemoni cərəyonədə bə hamsuyə kişvəron miyono bıə həmkarion jintonədə çı reqional əmniyəti təmin karde zəruriyyati işarə və votışe: İron həmçenan İraği stabileti, əmniyət və ərazi təmamiyyəti peştədəy və İraği obdon karde iyən ım kişvəri inkişofiro bə Tehroni tərəfo koməkon dəvom və vığandey təkidış heste.

Qeneral Hatəmi bə məntəğədə de terrorizm mubarizə barde meydonədə İron və İraği miyono bıə həmkarion işarəş və əlovəş karde: Asiya Ğərb məntəğədə xarıci ğıvvon işteraki ım məntəğə noəmnion amil bə hisobış varde.

Əv votışe: istikbori kişvəron xususi Amerkə rəftoron nışoş do ki bo məntəğə noəmn karde vey xəbisə planon hozzı kardəşone və əqə cinoyətkoron və terroriston vədə İrağ iyən Suriyə millət və dıvvləti muğavimət bə bıbe ısət məntəğədə noməlom iyən xətərnokə şərayeti muşahidə əkim.

İroni mudafiyə vəzir votışe bə məntəğə iyən bəşəriyəti qi bıə Şəhid Ğasim Suleymani iyən Şəhid Əbu Mehdi Muhəndesi həxon işarəş karde və votışe: muğavimət mehvəri rəzməndəon iyən İrağ və İroni millət ıştə ğəhrəmanon xuniku dənibəvarden.

İraği mudafiyə vəzir həm ım vindemonədə İronış dust, bıvə iyən hamsuyə bıə kişvər bə hisob varde kənoədə bə Tehron səfər kardeyku ıştə rizoyəti elanış karde və votışe: İraği millət hiç faxt de İŞİD terrorçiyə qurupi mubarizə barde zəmonədə İroni koməkon çı yodo benibəkarde.

İraği mudafiyə vəzir, zinə de ali heyyəti bə ico bə Tehron varid be.