Ğəzzədə bıə sionist rejimi cinoyəton barədə islami kişvəron passivəti dəvom kardedə.

İroni məhkəmə təşkilati bəşər həxon şobə rəis, Ğəzzədə bıə sionist rejimi cinoyəton xususi çandə beqınohə jenon və hırdənon ğətliami barədə islami kişvəron passivəti tənğidış karde

Bə İrib raporti əsos, Əli Bağıri Kəni, de sosyal şəbəkəonədə muntışir kardə mesaji vositə təkidış karde: sioniston bəpe kom cinoyəti əncom bıdən ta islami həmkarəti təşkilatədə uzv bıə kişvəron tərəfo qıləy iclos təşkil bıbu?

Əv nıvışteşe: ım təşkilati tərəfo iyən ali səthədə qıləy çəş nıkardə iclosi dəvoniye, çı Fələstin məzlumə millətiku himoyədorəti karde vey qədə ko bəhisob omeydə.

İroni məhkəmə təşkilati bəşər həxon şobə rəis ijən bə yodış dəğande ki? ərəbi kişvəron ki de sulh bəhonə ıştə əloğəşon de sionist rejimi normal kardışone və bə islami kişvəron peştiku xəncərışon jə, ımruj bəpe çı Fələstini hırdənon xun, inəon fəryod və dədəon istiğosə cəvobi bıdən ki sıvoy xıdo bə hiç kəsi pənoh barde əzı nin!

Əli Bağıri Kəni, ijən nıvıştışe: əqə tosə zinə de Amerkə və Avropa himoyəon Ğəzzə bənə dıyo yolə zindon iyən bəşər həxi hevuj surəti vey poymol bıə vırə zıneydə bimon, ısət de çand qələ qic və condoə Ərəbə hakimon himoyə Ğəzzə bə dınyoədə bıə insoni sutnə dıjdə kurə əvəz bıə.

İroni məhkəmə təşkilati bəşər həxon şobə rəis beynəlxalğ oğoə vicdonon bə meydon daxil bey tələbış karde ki bə din və məzhəbi diğğət nıkarde holədə Fələstin millətiku himoyədorəti kon, ta sionist rejimi vey yolə hərbi baza ki de Fələstin sərzəmini işğali vositə icod bıə vırt-vılo bıbu.