İroni İslamiyə İnğilab çı Fələstinə mubarizə qrupon simvole.

Fələstin ozod əkə Xalğ Cəhbə fərmondə votışe: İroni İslamiyə İnğilabi səbarzəti Fələstin milləti mubarizəonədə tojə ruf ijən hərəkəti icodış kardə.

Fələstin ozod əkə Xalğ Cəhbə fərmondə Əhməd Cıbril Tehronədə Fələstini İntifozə himoyə əkə beynəl xalğiyə 6 minə iclosədə təkidış kardə: jəqo ki İroni Yolə Rəhbər həm təkidışon kardə: Fələstini mıvzoe və məsələ qıləy siyasiyə mıvzo ni ijən etiğadi cəhəto qıləy əsle.

Əhməd Cıbril həmçınin bə İroni İslamiyə İnğilabi bə nav İronədə Amerkə vıjə İslami hakim bey işorəş kardə və votışe: İroni İslamiyə İnğilabədə ısət İslamı nabe Muhəmmədi hakime və ım çın inğilabi qıləy bərəkətone.

Im Fələstinıjə mubariz əlovə kardə: İmom Xomeyni(r) tojə əsrədə i minə kərə islam dini çı dırıst və səhihə roədə ijən bə cəhadi tərəf hərəkətış do və bəjiş kardə həmçınin ıştə vey məşhorə sıxani Amerkə və səvıt hukuməton barde yəni Amerkə yolə şəyton və səvıt hukumət qədə şeytononin elan və bəyonış kardə.

Əhməd Cıbril bə həminə nuktə ki İmom Xomeyni vindemoniku siyonizm rejim bənə xərçənq noxşəti heste və bəpe məhv bıbu işorəş karde və votışe: Hizbollah, Fələstinədə mığovimət ijən Suriyədə mığovimət bənə İroni Cəhbə i minə xət mandedə.

Fələstini himoyə əkə beynəl xalğiyə 6 minə iclos zinə sıb de İroni Yolə Rəhbəri muhimmə sıxanon ijən dınyo 80 qılə kişvəronku yolon huzuri Tehronədə bino be.

İroni Yolə Rəhbər ım iclosi ojbımoni mərasimədə votışone: Fələstin dardinə mıvzo ijən çın mığovim, səbr əkə iyən məzlumə milləti ğəm har ozod tələb, həx tələb və ədolətə tələbə insoni dıli bə dard vardedə.