Ğasımi: çı Bəhreyni rəsmiyon iddiaon be əsose.

İroni xarıci vızarətxonə sıxan əvot, çı bəhreyni rəsmiyon tojə ittihamonış İron və bəhreyni daxeli muzuon miyono rabitəon barədə be əsos zınəş bıə.

İroni xarıci vızarətxonə sıxan əvot Bəhram Ğasımi ımruj de Bəhreyni rəsmi şəxson iddiaon rəd karde votışe: Bəhreyni podşon çumçiku Bəhreyn ıştə daxıli bohranon həlkarde ijən bə şahrvandon həx və huğuği çokə cəvub doeku uciz mandə, bəzi faxton jıqo ıştə kişvərədə bıə cəmaəti sulhin eterazon bə İron nisbət dodən.

Ğasımi əlovəş kardə: bə milləti əleyh bevəcə siyasəton əncum doe xoto çı həmmə diktatorə hukuməton mıştərekə metod kişvəri bohranon ıştəni əvəzi bə co kəson qi ehaşeye əmmo ım şivə hıç faxt bə bohrani həl karde komək nibəkay.

İroni xarıci vezarət xonə sıxan əvot bə Bəhreyni dıvlət tosiyəş kardə ki, jıqo bə kanə metodon peşto por mande iyən kişvəri vəziyəti əmniyəti karde əvəzi, cəhd bıkən ki de sadiğ mande, ədalət iyən əxlağiyə şivə deştə milləti rəftor bıkən.

Bəhreyni de terrorizim mubarizə əkə şobə prokorəti, tojədən iddiaş kardə ki, Bəhreynədə qıləy terroristiyə qrup dəstqir bıə ki, 54 nəfər uzvonku(bə çəvon iddiaon əsosi) 12 nəfər İronıjin.