Rəyisi: rabitəon normal kardey, sionist rejimiro əmniyyət icod nıbəkay.
İron İslom Respublika prezident votışe: de məntəğə devləton sionist rejimi rabitəon normal kardey veyə cəhdon, əmniyyət icodəkə nebe və nibəbe.
Bə Fars aqentiyəti raporti əsos, Tehronədə Ğuds beynəlxalğə ruji aksiya kənoədə, İron İslom Respublika prezident, Seyd İbreym Rəyisi, ım reaksiya, islomi umməti vəhdəti simvole iyən votışe: Şərifə Ğudsi ozodi vey neze.
Rəyisi, sionist rejimi suğuti vey nez zınəşe və təkidış kardə: həmmə dınyoədə, ım cəmiyət nışo dodən sionist rejim və Ğudsi ozodi vey neze, ə çi ku təsəvvur bəbe həm vey neze.
İron İslom Respublika Prezident həmçınin Ğuds ruji reaksiyaədə, bə Tehroni milləti hərorətinə iştirok işorə və əlovəş kardə: həmmə islom dınyoədə ictimaoni ki bərpo bəbe, Fələstin, Livan və muğaviməti mıcohidon v mubarizonro, qıləy peştəpurətie ki bıznən coyli nin və ım meydonədə həmmə əvonku himoyə kardedən.
Zinə cımə, mubarək rəməzanə manqi 23 iyən Ğuds beynəl xalğə ruje və təğribən İroni 900 qılə di iyən şəhronədə anti israil aksiyaon bə həminə mınosibəti xoto bərpo bino bıə.
1358 minnə sorədə, İroni islamiyə nizomi yolə memor, Həzrəte İmom Xomeyni(r), bə dınyo həmmə mısılmonon vığandə qıləy mesajədə Rəməzan mıborəkə manqi oxonə cımə ruji bənə Ğuds beynəl xalğə ruji nom noşe.
Im tədbiriku hədəfi, Fələstini sıtəm vində məzlumə millətiku himoydorəti, Sionist be ğanunə rejimi cinoyəton iyən təhdidon vədə Ğuds intifozə zumandəti, bə ın rejimi ələyh cəhbə təşkil doey, israili məhv kardero lozimə zəminəon icod kardey iyən bə məzlumə Fələstinıjon komək kardeyro mısılmonə milləton vəhdət elan bıə.
