İron və İraği marzon əmniyyəti oxonə vəzyəti təğib kardey

Bəğdadədə bıə İron İslom Respublika səfir iyən İraği milli əmniyyəti mışovir, 2tərəfi əmniyyəti sazışon icro bey iyən marzon əmniyyəti oxonə vəziyət təğib kardışone.

Bə İrna raporti əsos, Bəğdadədə bıə İron İslom Respublika səfir, Muhəmməd Kazım Ale Sadığ iyən İraği milli əmniyyəti mışovir Ğasım Ələerəci vindemonədə mıştərəkə həmkoətion royku bə 2 qılə kişvəri əmniyəti əhəmiyyət iyən məntəğə stabiləti təkidışon kardə.

Ale Sadığ iyən Əleraci həmçınin əmniyyət baxşonədə və de terrorizm iyən ğaçağ mubarizə bardeyədə İron və İraği həmkoətion zumand iyən mehkəm kardey zərruri zınəşone.

İron və İrağ de təğribən 1258 kilometrə zəmini marz iyən 351 kilometrə ovi marz, hamsuyəon miyonədə vey dırozə mıştərəkə marzi soybin əmmo dəvardə soronədə ım mıştərəkə marz de veyə təhdidon xususi terroristiyə qrupon səmtiku dim bə dim bıə.

İraği şimolədə çand qılə terroristiyə qrup sakinin və ım məntəğəku bə İroni ələyh ıştə fəaliyətonku istifodə kənən.

Im qrupon vey kırdon əholi hestin ki İroni dəvardə poizə iğtişoşonədə veyə rolışon be və İronədə çəvon amilon nıfuz bois bıə ki addi milləti kıştə soxtey planon icro bıbu iyən vey İroni hərbi ğıvvon həm şəhid bıən.

Çand kərə İronihərbi ğıvvon İraği şimolədə terroristiyə qrupon vırə bombaon kardışone.