İnğilobi Yolə Rəhbəri nımoyəndə: canq iyən siyosətədə sioniston məğlub bıən

İrağədə bıə İslomi İnğilobi Yolə Rəhbəri nımoyəndə bə Ğəzzə Əlməmədani noxəşxonə sionist rejimi həmlə məhkum kardey təkidış kardə: ım həmlə nışoş do ki canq iyən siyosəti meydonədə sioniston məğlub bıən.

Dəvardə haftədə sionist rejim de Ğəzzə Əlmədani noxəşxonə bombardımon kardey ıştə vey torixiyə dəhşətinə cinoyəton əncomış do, Fələstini səhiyyə vəzorətxonə sıxənəvot, Əşrəf Əlğədrə elanış kardə: ım həmlədə 1000 nəfər Fələstinıjon vey şəhid bıən.

Bə İrna raporti əsos, İrağədə bıə İslomi İnğilobi Yolə Rəhbəri nımoyəndəAyətullah Seyd Muctəba Huseyni bəyonış kardə: Ələğsa Tufani tərkibiyə əməliyotədə bə sioniston vey muhimmə zərbə varid bıə, əv ijən təsdiğış kardə: ım vey muhimmə zərbə be ki 70 sori mıddəti cərəyonədə nımunəş nıbe və de ım əməliyoti vositə, deşmoni yoləti darşiyə bıə və həmmə dınyoəro çəvon puçəti subit bıə.

Ayətullah Huseyni ijən əlovəş kardə: Ələğsa əməliyoti zərbə jəğo be ki sionist rejim çəy cəvob doey əzı ni çən jığo cinoyəton əncom dodə ki bə həmmə beynəlxalğə prinsipon əsos, canqi cinoyət bə hisob omeydə.