Əmirəbdullahiyan: israil rejimi işğolçiyəti və Fələstinıjon etosniyeədə inqilisi rol ruşine
Zinə işəmbə rujədə İron İslom Respublika xarıci vəzir de İnqilisi xarıci vəzir telefoniyə votımonədə təsdiğış kardə: Fələstini behron, nə bə Oktiyabrə manqi 7 minnə ruji hodisəon rabtış heste bəlkəm bə israil rejimi 75 sor işğolçiyəti, Fələstinıjo əsosə həxon dəvominə təcavuz, Rələstinədə canqi cinoyəton əncom doey və ım məzlumə milləti etosniye obəqardə ki həlbətə ım məsələonədə, İnqilisi rol vey ruşine.
Bə İrna raporti əsos, İnqilisi xarıci vəzir Deyvid Kameron de Huseyn Əmirəbdullahiyan telefoniyə votımonədə 2tərəfi rabitəon və məntəğə oxonə təhəvvulaton barədə votıımonış kardə.
Im telefoniyə votımonədə Əmirəbdullahiyan ıştə umodəvo nışoş do ki İnqilis 2tərəfi rabitəon və məntəğə təhəvvulaton vədə, de realist və konstraktiv metodon bə rabitəon fəzo çokəti komək kardedə.
Im telefoniyə təmasədə İroni xarıci vəzir bə Fələstini beqınohə milləti ələyh sionist rejimi cinoyəton vədə, ğərbi kali devləton sukuti məhkum iyən təsdiğış kardə: İron İslom Respublika, Fələstini islomi muğaviməti hərəkət(HƏMAS)-i qıləy apartayd və anti işğolçiyə ozodiəbaxşə hərəkət zıneydə.
Əmirəbdullahiyan dəvomədə, Ğəzzə və Ukrayna vədə kali de ğərbi kişvəron və Amerk vositə 2curnə meyaron istifodə kardey vey bevəc zınəşe və votışe: nibəbe ki bə israil rejim icodə bıdəmon ki Ğəzzədə jenon, hırdənon ğətli-am və etosniye əncom bıdə və məntəğə otəş bıjəno əmmo sıə dıyoədə qıləy sionist rejimi kəşti oqətey bənə ım dıyo iğtisodi əmniyyəti təhdid kardey məno bıkəmon.
Im telefoniyə votımonədə ijən İnqilisi xarıci vəzir Deyvid Kameron həm de işorə bə sıə dıyo iyən Fələstini təhəvvulaton barədə bəştə kişvəri nəzəon, dıyovonəti əmniyyət və məntəğədə canqi hevujəti vəy qəteyro İroni cəhdon tələbış kardə.
