Ərağçi:Suriyə ayəndə bə veyə əvəzon şoyde
Ərağçi:Suriyə ayəndə bə veyə əvəzon şoyde
İron İslom Respublikə xarici koon vəzir bo ğalib omey zənn kardə kəson de Suriyə vəomə anqıl mıhokimə kardey rə hisob kardedə.
Bə Səhab şəbəkə bə İron Tələbə Xəbə Aqentəti(İSNA)istinodən doə məlumoti əsos,İron İslom Respublikə xarici koon vəzir Seyd Əbbos Ərağçi votəşe:felən de Suriyə ayəndə əloğədor mıhokimə kardey hələm rəye.bə çın kişfəri vəomə təsir kardə veyə faktoron heste.
İroni xarici koon vəziri təkidış kardə:bəçəy nəzə əsos,həm boəmə və həmən bo əyo səbarzəti bə dast vardey qımon kardə kəson mıhokimə kardey hələm rəye.ayəndədə ziyodə əvəzon bə əməl bome.
Suriyədə silohinə mıxolifət və terrorçiyon 27 noyabr 2024-ə sori Bəşər Əsədi hukuməti de hakimiyyətiku peqordıney məğsədi Hələbi şimol-ğərb,ğərb və cənub-ğərbədə hərbi əməliyyotonışon bino karde və nəhoyətən 11 ruj bədiqə dekabri 8-ədə çe Suriyə poytaxt Dəməşğ şəhri bəştə nəzorəti vardey və Əsədi çın kişfəriku şeyışon bəyon kardə.
De Bəşər Əsədi hukuməti suğuti bənə Amerkə,Tırkiyə və seonist rejimi bıə işğalçiyə kişfəron bo Suriyə əraziyon həni həm işğaliro qıləy çokə fırsət icod bıə.
Bə Amerkə Mıdofiyə Vəzirəti(Pentaqon) votey əsos,çe Suriyə de nati pur bıə zonəonədə çın kişfəri sərmoyəon ğarət kardə bə dı həzo nezi amerkəvıjə əskər heste.
seonist rejimi sər vəzir Benyamin Netanyahu 1974-ə sori Colani məntəğədə Suriyə de seonist rejimi miyono bastə bıə “coəti” sazişi iflos beyış elon karde və çın rejimi ləşkər çın kişfəri cənubədə,xususən həm Suriyə cənubədə vağe bıə ərazi Ğuneytəra şəhrış işğal karde və çı Suriyə hərbi infrastrukturonış hevujə şikilədə məhfış karde.
8 sor bənav 2016-ə sori dekabri 24-ədə bə Suriyə ərazi daxil bıə Tırkiyə ləşkəri çın kişfəri şimolədə əraziyon işğal dəvom kardedə.