De sulhinə roon Ərəbistonədə hukuməti əvəz kardero qıləy koalisiya təşkil bəbe.

Ərəbistonədə i dastə siyasi mıxolifə cərəyanon çın kişvərədə de sulhinə roon hukuməti əvəz kardero qıləy koalisiya təşkil doeku xəbəşon do.

Xəlic-Əlcədid aqentiyəti raportış doə ki həminə mıxolifə qrupon koalisiya soxteku hədəf həmmə partiyaon miyono i bemon ijən Ərəbistonədə detosə Ali-Səud rejimi məğlub karde xoto bə islohot və əvəz bey himoyə dorti karde heste ijən təsdiğ bıə ki əqə Ərəbistonədə islohot əncom məbu fəğət de inğilob və Səudi Ərəbistoni rejimi məhv karde bəbe kişvər çı diktatoriyə hukuməti dastiku nicot peydo bıkə.

Ərəbistoni mıxolifə qrupon elanışon kardə ki: Ali Səud rejim Ərəbistoni bə puəçti tərəf bardedə və ısət Ərəbiston islam dınyoədə həmmə ğeyzin, represiv və terroristiyə hərəkəton planəkə mərkəze.

Həminə tojə təşkil bıə koalisiyaədə Ərəbistoni Əlommə, Əhrar Cəzirətol Ərəb, Əltəcdido İslami, Əlfuzul nomo bıə mıxolifə icma, partiya və qrupon uzvin.

Ərəbistoni diktatoriyə hukumətədə siyasi fəalon, ozodəti və iştimaiyə hərəkəton de şiddəti sərkob və məhdud bıdə, anədə ki şiəyon ım kişvərədə hiç həx-huğuği xıvand nin.