İnqiltərədə bıə İroni səfir bə terror təhdid be.

İnqiltərədə Şirazi nomo bıə firğə tərəfdaron bə İroni səfarətxanə həmlə karde barədə İroni məclesi mili əmniyyət və xarıci siyasət kamissiya məxsusə foğoladə iclos ımruj bərpo bıə.

İm iclosədə muxtəlif rəsmi şəxson huzurışon be ta ım hadisə iyən Şirazi nomo bıə firğə tərəfdaron hədəfi pardə peştədə bıə məğsədon oşko bıbu.

Əmmo xəbə omə ki tojədən ım Firğə qıləy tərəfdaron Londonədə çı İroni səfir terror karde mesaji muntəşir və Həmid Bəidinejadi təhdidış kardə.

Bəidinejad ıştə Tuvitter səhifədə Husein Mərəşi Ğəzvini nomo bıə şəxsi təhdidon muntəşir karde bəpeştə İroni məhkəmə təşkilati iyən əmniyyəti ğıvvonku ım təhdidon təğib karde tələb kardə.

Londonədə İroni səfir həm İnqiltərə dıvləti tələbış kardə ta jıqonə təhdidon vey qəte kənoədə iyən İroni səfarətxanə əmniyyəti təmin karde bə beynəl xalğ ğanunon əməl bıkə.

Tojədən xəbə omə ki Avestriyaədə qıləy noşınasə şəxs ki de çəxo bə İroni səfiri kə hucum karde məğsədış be de ım kişvəri polis ğıvvon qollə kıştə be.

Im noşınasə Viyanıjə şəxsi huviyyət və məğsəd hələ məlum bə ni.

Cımə çı Sadığ Şirazi tərəfdaron ki Şirazi firğə nomışone Londonədə bə İroni səfarətxanə həmlə karde bəpeştə bə İroni boydığ be ehtıromtəti karde kənoədə çandə bə əhli sunnəti mığəddəsaton tohin kardən.