İronədə Ğədrə şəvonku 1-nə şəvi mənəvi mərasim bərpo be.

De dindaron və mısılmonon əzəmətinə iştiraki İroni mıxtəlif vıronədə Ğədrə şəvonku 1-nə şəvi mənəviyə mərasimon bərpo be.

İmomət və vilayəti aşığon mubarəkə rujə manqi 19-nə şəvədə ironi mıxtəlif vıronədə bıə məçiton, təkiyəon, huseyniyəon, ımomzodəon iyən məzhəbiyə vıronədə cəm bin və detosə sıb Kərimə Ğıroni ğəraət kardən, Coşəne kəbir nomo bıə dıvoşon hande və ilahi əzəmətinə nomonışon zomzomə kardən.

İroni mısılmonə millət xususi Məşhədədə bıə İmon Reza(ə) pokə hərəm ijən Ğomədə bıə Xanım Məsome(s) iyən Cəmkərani pokə məçitədə deştə əzəmətinə huzuri ujnən de İmom Əli(ə) və Xıdovənd xalıği əhdışon baste.

Əhle beyte ismət və təharət(ə)-i məddahon həmçınin zinə şəv molaye muttəğiyan Həzrət Əli(ə)-i həxədə nohə iyən mərsiyəşon hande.

Rujə manqi 19 minə səhərədə Xəvaric qrupiku İbne Mulcəm Muradi qıləy holədə ki İmom Əli(ə) Kufə məçitədə nımoj vote holədə be dıştə zəhrinə şımşi ə Həzrəti mıborəkə sə anədə de şiddəti zəxmin kardə ki oxoy sə şiəyon i minə İmom 2 ruj bəpeştə yəni rəməzanə manqi 21 kədə şəhid be.

Bə rəvayəton əsos mubarək rujə manqi 19, 21 və 23-nə şəvon həmonə Ğədrə şəvonku iborəte ki mısılmonon de şəvədə oğo mande, Ğıroni bə sə noe, dıvo hande, Coşən Kəbir nomo məxsusə dıvo ğiroət karde deştə Pərvərdıqori raz-niyaz və mınocat kardedən.

Ğədrə şəv qıləy şəve ki 1 sori mıddətdə çəy fəzilət bənə 1000 manqədə ibodət karde ğeyd bıə və həmonə şəvədə cəmaəti təğdir və tale mıəyyən bəbe.

De İmom Əli(ə)-i inoyət inşaəllah ki şımə zinə Ğədrə şəvi ibodəton ğəbul bıbu.