Dınyo aqentiyəti iyən mediyaonədə İroni İnğilabi Yolə Rəhbəri tojə bəyonaton reaksiyə.
Dınyo aqentiyəti iyən mediyaonədə Həzrəte İmom Xomeyni(r) bəfoti 29-nə sorqardışi mərasimədə bıə İroni İnğilabi Yolə Rəhbəri bəyonaton vey diğğəton bəştə tərəf cəlb kardışe.
Pokistoni Daun Niyuz aqentəti və Ceo Tv televiziya kanal elan kardışone: İroni İnğilabi Yolə Rəhbər Həzrəte Ayətullah Xamenei Həzrəte İmom Xomeyni(r) bəfoti 29-nə sorqardışi mərasimədə elanış kardə əqə deşmənon bə İroni tərəf 1 qılə rəketi ğandey curətışon bıbu de 10 qılə rəketon çəvon cəvobi bədomon.
Azərbaycan Respublika Terend aqentiyə internetiyə saytədə ğeyd be: İroni İslami İnğilabi Yolə Rəhbər İroni ətomiyə bərnomə kontroli dəvom peydo karde han və botilə xəyoli bardədə əv həm qıləy şərayetədə ki Tehroni iğtisodiyə sanksiyaon dəvomış heste bə Avropavıjə rəsmi şəxson xəbədorətiş do.
Tırkiyə madiyaon əcumlə Anadoli, Xəbə Turk və Star rujnoməon həm ətomi ğəncin karde xoto bə dəvardə zəmon oqarde zəminəon hozzo kardey barədə, bə İroni ətom eneji təşkilati İroni İnğilabi Yolə Rəhbəri tojə əmri ki bo ğərbiyə kişvəronro qıləy çəş nıkardə peyğom hisob kardışe ijən zəminiku sionisti rejim məhv karde barədə Ayətullah Xamenei sıxənəon ıştə rujnoməon titr kardışone.
Dınyo co aqentiyətion əcumlə Əlməyadin televeziya kanal, Skay Niyuz, Səudi Ələrəbiyə, Əlaləm, Əlcəzirə və Ərəbiyə BBC televeziya kanalon, Rusiyə Əlyəom iyən Raşatudi həmçınin Royterz və Fransə aqentiyətion həm elan kardışone: İroni İnğilabi Yolə Rəhbər deşambə ruji bə Avropa xəbədorətiş doə ki ım mıvzo barədə fik karde ki İron həm ətomiyə bərnoməonədə məhdudiyəti ğəbul bıkə və həm iğtisodiyə sanksiyaon jentonədə bımando qıləy hane ki təəbir nibəbe.
Ruyterzi raport doə mətləbədə bə İroni İnğilabi Yolə Rəhbər sıxənon ım baxş işərə be ki İroni rəkıtiyə bərnomə məhdud karde qıləy xiyole ki bə vaği nibəbe.
Vaşənqton Post və Asoşieted-Peres həm ıştə raportonədə ım sıxani muntəşir kardən: "bə həmmə həmləon cəvob doero İroni İnğilabi Yolə Rəhbəri vədə".
Spotink həm ıştə rapori onvaədə İroni İnğilabi Yolə Rəhbəri ım sıxənonku istifodə kardışe: "bə deşmənon xaticəm nimon, Tehron xarıci fişaron bərobərədə təslim nibəbe".
Cerozelm Post sionistiyə rujnomə, İndependent, Əlməyadin aqentiyəti kanal və Livani Ənoşrə aqentiyəti hə ıştə raportonədə titr kardışone: "deşməni har 1 qılə ğandə rəkıti vədə İron 10 qılə rəkıti əv həm de şiddəti bəğande".
Faks Niyoz həm bə İroni İnğilabi Yolə Rəhbər ım sıxənon işorəş kardə ki canqiku tars ğərbiyə kişvəron təbliqiyə koe.
Yues Niyoz həm ıştə raportədə bə "İroni ətomiyə bərnomə məhdud karde təbir nıbıə xəyoli" ki İroni İnğilabi Yolə Rəhbəri sıxənonədə ğeyd bıə işorəş kardə.
Ələrəbiyə və Avro Niyuz Ərəbiyə kanal həm ıştə raportonədə çı İroni İnğilabi Yolə Rəhbəri sohbəton barədə bə ım məsələ təkid kardışone ki mnətğədə mığovimət cəhbəku İron himoyə hejo dəvom peydo bəkay.
Kuveyti aqentiyəti həm urani qəncin kardey barədə ijən kişvəri zərfiyəton bə 190 həzo SWU rosniyero bə İroni İnğilabi Yolə Rəhbər əmri işorəş kardə.
İslami İnğilabi yolə rəhbər deşambə əsrə vaxti ironi islamiyə nizoi təsisəkə həzrət imom Xomeyni(r) bəfoti 29-nə sorəqardışi mərasimədə iyən əzəmətinə ıştirokəkəyon cəmədə bə ironi atom enerji təşkilat əmış do bə atom sazışi əsosi urani qəncin karde zərfiyəti bə 190 həzo SWU rosniyero şərayeton iyən lozimə hozzıətion icod bıkən.
