Avropa ittifoğ bə de İroni ixtisodiyə həmkarion təkid kardedə.
Moqerini bə Avropa ittifoğ və İroni miyono zumandə ixtisodiyə həmkarion təkidış ka.
Avropa ittifoği xarıci siyosəti məsul bə de İron ım təşkilati iradə bo iğtisodi və ticariyə həmkarion və rabitəon zumandəti əv həm Amerkə təziğon və sanksiyaon sayədə təkidış karde.
Bə Fars aqentiyəti raporti əsos Avropa ittifoği xarıci siyosəti məsul Fedrika Moqerini zinə Sinqapur Naniyan unniversiti Racaratnam beynəl xalğiyə mıtoliə hande ali məktəbədə votışe: qıle holədə ki Amerkə bə İroni zidd sanksiyaon bino karde holədəy, əmo Avropa ittifoğ bə de İron ticari və iğtisodiyə həmkarion zumandəti fikədəy.
Moqerini ətomiyə sazışiku Amerkə xarıc bey ım kişvəri tərəfo beynəl xalğiyə muğaviləon ləğəkə zınəş be və əlovəş karde: ətom enerji beynəl xalğiyə aqentəti nəzorəton həmişə İroni bə muğaviləon iyən ətomiyə sazışi pobəndəti təiyd kardedə.
Ətomiyə sazış 2015-nə sori İyul manqi 14 Avstriyə İron, Avropa ittifoğ və 5+1 qrup (İnqeltərə, Fransə, Amerkə, Russiyə, Çin və Almaniya) miyonə imzo bıə.
Amerkə prezident Donald Trump dəvardə Mayə manqi 8 ətomiyə sazışiku xarıc bey və tojədən sanksiyaon bə İroni əleyh oqardəku xəbəş do.
Amerkə dıvləti ətomiyə sazışiku xarıc bey de daxıli və beynəl xalğiyə zumandə məhkumiyəton dim bə dim bıə.
