Omani dıyoədə hadisə çe dınyo ictimaiyyəti diğğəti mərkəzədəy.

Dəvardə həftədə Omani dıyoədə bə 2 qılə natkırniə kəşti sə qətə həmlə tosə ısət hələən dınyo ictimaiyyəti nəzəri-diğğəti cəlb kardə əsasə məsəlonədəy.

Amerika həmonə hadisəon vağeə bıəcəğin elan kardışe ki, quya İron bı koədə qınokare, çəyo ıştə ım votəy əsasin karde ro qıley bevəcə təsvirinə video pevolo kardışe. Im anədə beməzmunə rolik bıe ki, hətto çe Amerika muttəfiğonən bımi neqativ munasibət nişon doşone. Almaniya hokuməti rəsmi numayəndə bə Amerika tərəfi pevolo kardə video de şubhə nəzər səğandışe,  votışe ki, ım, İroni bı insidentədə roli subut karde ro kafi ni. Rusiya siyasi analitikonən ğeyd kardedən ki, AİŞ məğsəd İroni tam bə blokada seye, ısət bımi ro Omani dıyoədə vağeə bıə həmonə insidentiku bənə vonə istifadə bəkarde. Ey bə həmonə hadisə məkon de “tomoqavk” raketon təchiz bıə qıley esmines vığandəşe, de ım vonə ki, quya əvon ım hadison təhğiğ karde ro koməkəti nişon bədon.

Digər təhlilqəron de ım insidenti əlağədar İMT Əmniyyətə Şura vanq karde, çe ım məsələ muzakiron dəvunie zərurəti ğeyd kardedən. Əmo Amerika tərəf hələ ki, ımi zəruri zınedəni, bəştə təcavuzkarə məğsədi muvafiğ hərəkət kardedə.

“Faktxəbər.com” sayt İİR XK vəzir Muhəmməd Cavad Zərif`i fikir bəştə əhandon nəzə rosniəşe. Zərif ıştə Tvitter səhifədə nıvıştedə ki, Omani dıyoədə sə qətəyon xeyli şəkvardə məsələy. Bı koədə bə ım təxribati əməli Yaponiya Sər vəziri de Ali Rəhbər Ayətullah Xamenei didori vaxtonədə vağeə bıe diğğət səğande lozime.  

Əlavən ğeyd karde vacibe ki, həmonə kəştion nati bə Yaponiya bardedəbin. Yaponiya İğtisadiyyat, Ticarət və Sənaye vəzir Xirosiqe Seko`ən ım fakt ğeyd kardəşe.  

Yaponiya hokuməti sərdari İronədə xoşməraminə səfəri vaxti  İroni tərəfi bə Yaponiya ticari əlağə xidmət kardə obyekton hucum təşkil karde bovə kardəkəsi çanədə ğeyri-adekvat və ğərəzinə odəm bıe oşkorə fakte.