Əmniyyəti tədbiron jentonədə Əfğanıstani prezidentəti səçın bino be.

Imruj sıb həmzəman 5 həzo mərkəzədə iyən 30 həzo sədo cəməkə şobədə Əfğanıstani prezidentəti səçın bino be, ım səçın detos çoştə bəpeştə dəvom kardedə.

Əfğanıstanədə səçın qıləy şərayetədə bino bıə ki Taleban və Daeş bə sədo cəməkə şobəon həmlə karde barədə xəbəş doe və təhdidış karde.

Əfğanıstani səçın mıstəğil kamissiya həminə mıvzo barədə elanış karde ki 45 qılə şobə ki çımiku bənav bo sədoon cəm karde xoto nəzərdə qəte bıə be əmniyyətiyə problemon xoto ojni bəbe.

Həminə çərçivədə xəbə ome Nimruz viloyətədə 2 qılə bombaon əmniyyətiyə bıhrani bois be.

Ğəndəhar viloyətədə həm 15 nəfər sədo cəməkə şobə ədə zəxmin bıən.

Kabul viloyətədə həm qıləy bomba tepmon hadisə sədo cəməkə mərkəzədə əmniyyəti problemon icodış karde və sədo doe cərəyonədə şobə tətil karde bois be.

Ğəzəni və Helmənd viloyətonədə həm Taleban de rəket bə qıləy səçın mərkəz həmləş karde.

Talebani ğiloğal və problem icodəkə hərəkəton qıləy şərayetədəy ki Əfğanıstani prezidentəti 2-nə moavin bə səçıni prossesədə dəğiğə kontrol və nəzorəti təkidış karde.

Əfğanıstani milli vəhdət dıvləti rəis həm təkidış karde ki ım kişvərədə prezident səçıni dəvoniyə, Əfğanıstani sulh prossesədə təyinəkə rolış bəbe.

Əfğanıstanədə İroni səfarətxonə həm ım kişvəri səçın rəğabətonədə milləti iştirok bə təğdiri loyiğ hisobış karde.