Suriyə şimolədə Tırkiyə qıvoninə tələfot.

Məntəğə mediyaon Suriyə İdlebədə Tırkiyə ərtışi qonə tələfotiku xəbə dodən; məvuji tojə əməliyatədə 33 nəfər çı Tırkiyə hərbiçiyon həlok bıdən.

Bə rəse xəbəon əsos, Tırkiyə cənub Hatay ostani icra hakim elanış karde ki Suriyədə bıə bə Tırkiyə ğeyri ğanuni hərbi bazaon Suriyə ərtışi zinə şəvi həvo həmlə nəticədə Suriyə şimol ğərb İdlebədə 33 nəfər çı Tırkiyə hərbiçiyon həlok və çand da nəfər həm zəxmin bıdən.

Tırkiyə prezident aparati məlomat ərosnə şoebə rəis ım həmlə bəpeştə votışe ki bə Suriyə ım həmlə reaksiya nışo bədamon.

Xəbə ome ki çand saət çimi bənav Tırkiyə əmniyyəti iztirori iclos de rdoğani iştirok bərpo be.

Tırkiyə dıvləti muxalif partiyaon həm Suriyə İdleb ostani oxonə vəziyət iyən Suriyədə Tırkiyə dıvləti siyasəton barədə qıləy iclosi bərpoşon karde.

Tırkiyə mudafiə vəzir həm məvuji bə sərhədədə əməliyat mərkəzi varid be və xəbəon bə Suriyə əleyh çı Tırkiyə həmləonku hikayət kardedə.

Amerkə həm çı Tırkiyə be ğanunə siyasətiku himoyədorəti karde çərçivədə rəsmən elanış karde ki Natoədə bıə ıştə mıttəfiğ yəni Tırkiyə kənoədə bemande.

Xəbə ome Suriyədə çı Tırkiyə ərtışi tələfoti ziyod bey bəpeştə Tırkiyədə sosiyal şəbəkəon dıvləti tərəfo bastə be.