İroni prezident bə de hamuyə kişvəron həmkarəti strateqiya təkidış karde.

İroni prezident votışe: təhrim və sanksiyaon be əsər kardeyro de hamsuyə kişvəron əloğə oqəte siyədət bənə qıləy strateqiae nə taxtika.

Bə İRİB raporti əsos, Seyd İbrohim Rəisi xaricədə bıə İroni nımoyəndətion rəison iclosədə bə de hamsuyə kişvəron əloğə oqəte təmərkuzi təkidış karde iyən votışe: de diğğət bə İronədə bıə mıvcudə zərfiyəton, bəbe de hamsuyəon mıbodiləon vey kəmon ki xarıci vəzorətxonə bəpe ın sahədə vey təsirin bıbu.

Əv bo sanksiyaon peqəteyro bə İroni 2 qilə sterateqiyaon işorəş karde və votışe: bəzion əvotin ki İron muzakirə nibəkarde və ya xod ciddi ni iyən zəifə təklifon dodə, əmmo İron vey ğəyrətmand muzakironədə içtirokış karde və de təklifon edaşte nışoş do ki muzakironədə ciddi əməl kardeydə.

Seyd İbrohim Rəisi təkidış karde: əqə muğabilə tərəfon bə İron tətbiğ kardə sanksiyaon peqəteyro ciddi bıbun, çokə saziş imzo bəbe və İron həm çokə sazışi pidəşe.

İroni prezident ıştə sıxanon co baxşədə məntəğə kişvəron de sionist rejimi əloğəon normal kardeyku ıştə niqəronəti elanış karde və votışe: ın ko nə bo sioniston və nə bo məntəğə kişvəron əmniyət icod əkə ni.

Rəisi əlovəş karde: bəzi kişvəron cəhd kardeydən ki de sionist rejimi ıştə əloğəon adi və normal kon və həm sioniston ıştə sərhəddi ətrof vırə bıdən əmmo ın ko benəticəy.

Əv İronış çı məntəğə kişvəron xeyrxah bə elan kardışe və votışe: de İron əloğə oqəte iyən muxtəlif baxşonədə həmkarəti bə məntəğə əmniyəti komək kardeydə.

İroni prezident çı Əfğanistoni behroni ın kişvərədə xarıcion mudaxilə nəticə bə hisobış varde və votışe: Amerkə və Nato təşkiloti iştiroki bəpeşt Əfğaniston hiçfaxt orom nıbe və xoşə rujış nıvinde, ki nəticədə ısət narkotik maddon behron həm vindey bıdə.