İron və Tırkəmənistoni prezidenton bə 2 tərəfi əloğəon inkişofi təkid kardışone.

İron və Tırkəmənistoni prezidenton ıştə telefoni rabitə cərəyonədə 2 tərəfi həmkari iyən əloğəon barədə muzakirə kardışone.

Bə irib raporti əsos, Seyd İbrohim Rəisi zinə de Ğurbanğuli Berdi Məməvov telefoni rabitə cərəyonədə bə nəğliyot iyən tranzit sahədə həmkarion inkişofi təkidış karde və votışe: de 2 qılə kişvəri rəsmi şəxson həmkarəti iyən koon vositə sərhəd həmkarionədə vey mısbətə hərəkəton əncom bıə.

İroni prezident təsdiğış karde: qaz baxşədə bıə həmkarion iyən de İroni vositə Tırkəmənistoni qazi bə Azərbaycan Respublika ovoştoniyero həm vey çokə koon əncom bıə.

Tırkəmənistoni prezident həm bə hamsuyə kişvəron miyono bıə həmkarion əhəmmiyəti təkidış karde və votışe: İron və Tırkəməniston de çand həzo sor həmkari və sivilizasiya çəhəto mədəni mıştərik noğtəon bəpe beynəlxalğ cəhəto həm bə həmkarion inkişofi fik kon.

Ğurbanğuli Berdi Məməvov bə Tırkəmənistoni ticarət sahədə İroni rol və vırə işorəş karde iyən votışe: tib və səhiyyə baxşədə İron vey barzə vırə soybe.

Əv həm de İroni vositə Tırkəmənistoni qazi bə Azərbaycan Respublika ovoştoniyey vey muhimmə ko bə hisobış varde iyən ın baxşədə və koon bə nav bardeyro qıləy mıştərək kamisiya icod kardış pidə.