Rusiya – Ukrayna miyono hərbiə munağişə bino bıe
Fevrali 22-minə ruji Rusiya Prezident Putini Ukrayna cənub-şərğ vilayətonədə jiə rus mənşəninə əhali elan kardə Donetsk və Luqansk Respublikaon rəsmən zıneşe və həmkarəti barədə de çəvon sərdaron muğavilə dəbastışe
Im faktı çe Ukrayna bə həmonə respublikaon hərbiə həmlə həniən zumand kardışe. Çunki Kiyev əvoni separatist, həmən terrorist hisob kardedə.
Fevrali 24-də Rusiya hərbiə ğıvvon bə Ukrayna ərteşi 74 qılə strateji məntəğəon və bə Ukrayna Siyo dıyo Hərbi donanma de raketi zərbə jeşe , əvonış çe restə bekarde. Isət ım hadisə çe dınyo ictimaiyyəti tərəfo ən muzakirə bıə məsələy. Ğərbi bə Rusiya xeyli fərdi, həmən iğtisadi sanksiyaon elan kardışe. Amerika prezidenti Rusiya ım hərəkət məhkum kardışe, əmo votışe ki, İbə Ştaton bə Ukrayna ıştə ərteşi əvğandıni. Çe Rusiya Xarici Koon Vəzarəti sıxanəvot Mariya Zaxarova ıştə bə Ğərbi doə cəvobədə votəşe ki, ım çanq ni, 8 sori muddətədə dəvom kardə canqi bə orəx rosnie ro bino bıə əməliyyate.
Rusiya de həmonə respublikaon muğavilə dəbastə ruji, həmən de Az.R Muttəfiğəti həxədə Bəyannamə dəbastışe, Prezident Əliyevi de Prezident Putini Kremlədə bə həmonə sənədi ğol kəşeşone. Rusiya tərəfi həmonə rujədə İlham Əliyevi bə Moskva dəvət karde, dey ım məzmunədə bə jıqo sənədi ğol kəşe vasitə bımi işarə jedə ki, Az.R Ukrayna ğəzinə deştə ətrofə devləton və xalğon deşmenə siyasət bəpe nıbardo, çimi bə peş ıştə siyasətədə proqressiv qıley əvəz bıkardo.
Fevrali 24-də Prezident Putini de İİR Prezident Seyid İbrahim Rəisi telefonə molağat bardəşe. RİA Novosti doə xəbəku məlum bedə ki, Rusiya Prezidenti de Ukrayna bino bıə ım hərbi munağişə barədə de İroni prezidenti molağat bardəşe, Rusiya tərəfi mevğe izhar kardəşe. Ağaye Rəisiən çe Amerika, həmən NATO bloki təxribati hərəkəton bo Rusiya əmniyyəti bə əməl vardə xəto barədə votəşe, ımən ğeyd kardəşe ki, joqo xəto bə Rusiya norohəti səbəb bıeyən labud qıley zərurəte.
İroni Xarici Koon vəzir Abdullahian Ukrayna ətrofədə bə əməl omə jıqo qıvoninə vəziyyətədə NATO qınokar zınəşe. “Lenta.ru” sayti doə ım xəbəku məlum bedə ki, İroni vəziri ımən ğeyd kardəşe ki, çok bəbe tərəfon atəşbast elan bıkon, de siyasi və demokratikə vasitəon ım problemi həll bıkardon.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.
