Ukrayna millət çı Amerkə şəytoni siyasəton jintonədə ğıboni bıən.

İroni prezident votışe: İroni de canq muvafiğ ni və har çəxtə ki canq rə sə kardə bıbu bə milləton mənafe bəbe.

Bə İrib raporti əsos, Seyd İbrohim Rəisi zinə və dıvlət kabineti iclosədə bə Ukrayna vəziyəti iyən çəy milləti behroninə şəroyeti işarəş karde və votışe: Ukrayna millət həm bənə Yəmən, Əfğaniston iyən İraği millət çı Amerkə şəytoni siyasəton jintonədə ğıboni bıən.

Rəisi təkidış karde: İron jəğo ki Yələ Rəhbəri həm işarəş karde de canq muvafiğ ni və har çəxtə ki canq rə sə kardə bıbu bə milləton mənafe bəbe.

İroni prezident çı Viyana muzakiron oxonə vəziyəti barədə həm izhorış karde: İroni xarıcə vəzorətxonə de zumandəti və diğğəti muzakiron təğib kardeydən əmmo dıvləti tərəfo hiç koy bə muzakirə rəbt və vabəstə bə ni.

Rəisi ətomiyə sazışi çı İroni xarıci siyasəton i baxş bə hisobış varde və təkidış be ki: dəvardə 6 manqi mıddətədə bıə İroni dıvləti muvəffəğiyəton rəmz ım be ki nat və bank sahədə koon be ım ki bə atom sazışi anqıl jə bıbu təğib bıə.