Ğərb Ukraynadə bə atəşbasti nail bıe pidəşe.

Rusiya-Ukrayna molağaton 3-minə raund orəxə bəpeş Moskva tərəfi numayəndə Medinski bə muxbiron votışe ki, əmə bə didor de konkretə təklifon layihə oməbimon, əmo vəynə tərəf əvoni muzakirə kardeku okırie

Humanitar koridoron həxədə dırozə qəpon bardımone. Umu heste ki, əhali çe ım koridoronku istifadə karde imkanşon bəbe.

    Peşo Rusiya Mudafiə Vəzarəti məlumat pevolo kardışe ki, marti 8-minə rujiku bəpeş Ukrayna 5 qılə şəhəri əhali təxliyyə karde ro 10 qılə humanitarə koridor elan kardə bıə, və bı həxədə bə həmonə şəhəron əhali məlumat doəşone. Ukrayna hokuməti isə cəmi 1 qılə koridor təsdiğ kardışe, çey barədə bə əhali məlumat doşe. Jıqo vəziyyətədə çəvon nasistə batalyonon de har vasitə bə əhali şəhəron tərk karde mane bedəbin, hətto bəvon qoluləən ğandedəbin.

Umumən isə 2 milyon 500 həzo Ukrayna şəhrıvandi ki, çe ım keşvəri 1917 qılə məntəğədə jimon kardedən,  bə Rusiya ovaşte ro bə Moskva muraciət kardəşe. Rusiya tərəf həmonə odəmon siyahi hətto bə İMT təğdim karde bəzıne, əmo əv Ukrayna faşistə rejimi ım siyahi bə dast varde və bə həmonə odəmon divon qəte ehtimaliku ə siyahi niyo kardedə. Rusiya ərteşi be Ukrayna tərəfi koməki 5 həzo 334 nəfər təxliyyə kardəşe, çəvon 223 nəfər xarici keşvəron şəhrıvandin. Əvon votəşone ki, Ukrayna marzəvonon çəvonku bo marzi ovaşte ro 1 həzo dollariku tosə 5 həzo dollar rışvə tələb kardedən.

Marti 9-ədə Rusiya tərəfi humanitarə koridoron ətrofədə arameşə rejimi dəvom elan kardışe, bə Ukrayna hokuməti təklif kardışe ki, ım koridoron həxədə bəştə şəhrıvandon, həmən bə muvafiğə beynəlxalğə təşkilaton məlumat bıvğando.

    Ğərb isə, diə məkəmon ki, bə Ukrayna hərbi texnika, silah və sursat, həmən ıştə məraminə ğıvvon vığande barədə rəsmi bəyanaton elan kardəşe, çe Rusiya tərəfo atəşbast elan karde pidəşe. Bımi ro Avropa İttifaği diplomatiya səvon Jozep Borrel hətto çe Çini Xarici Koon Vəzarətiku xahiş kardəşe ki, Ukraynadə atəşbast bə dast varde ro bə Rusiya tərəfi təsir bıkardo. Im xəbə Meydan TV doəşe.  

Rusiya ərteşi ğıvvon Ukrayna hərbi infrastrukturon məhvi dəvom kardedən. Prezident Putini mətbiatə katib Dmitri Peskovi votəşe ki, Rusiya Ukraynadə demilitarizasiya əməliyyati dəvom kardedə, tosə ısət çe rəğibi hərbi ovdonon , həmən infrastrukturi 75 faiz məhv kardəşe.

 Əlavən bıvotəmon ki, Luqansk Respublika ərteşi  çe Luqansk vilayəti inzibati ərazi, ğeyrəz 3 qılə şəhəri, bəştə nəzarət ovıştıniəşe. Donetsk Respublika ərteşi isə ıştə vilayəti 50 qılə şəhər və ğəsəbəon çe nasistonku azad kardəşe.

İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.