Bə Avropa Əmirəbdullahiyani nota.
İroni daxıli koonədə çı Avropa mıdoxiləon dəvom peydo kardey barədə və de Fransə xarıci vəziri votımoni cərəyonədə Əmirəbdullahiyan bə Fransə xarıci vəziri notaş do.
Bə İrna raporti əsos, Zinə İroni xarıci koon vəzir Huseyn Əmirəbdullahiyan de Katrin Kolona telefoniyə votımonədə, əlovəş karde: əqə Avropa ittifoğ, məhdudəkə hərəkəton əncom bıdə, Tehron həm çəy cəvobədə hərəkət bəkarde.
Əv ijən əlovəş karde: ım votımonədə təvafuö kardemone ki bəpe 2 tərəfə rabitəon bə ehtırom iyən yande mənafe əsos bıbu.
Bə Məhsa Əmini marqi bəhonə İronədə iğtişoşon əncom bey bəpeştə, Fransə, Britaniya və Almaniya ki atomiyə sazışi uzv bıə kişvəronin de Amerkə bə ico iğtişoşon himoyə cəhəto bə meydon varid bıən, və həminə cəhətədə nı fəğət mıdoxilə bəyoniyəon muntəşirışon kardə bəlkəm sankisiyaon əncom doeyku həm sıxən votıçone.
Həminə cəhətədə, dəvardə dışəmbə rujədə, Britaniya bə İroni ələyh çand qılə əmniyyəti və siyasi ali rəsmi şəxson iyən qıləy təşkilat, sanksiyaon əncomış do.
Həminə mıvzo barədə ,qıləy Almaniya xarıci vəzarətxonə mənbə həm elanış karde: Avropa ittifoği tojə sanksiyaon əncom doeyro ,Almaniya, Fransə, Danmark, Espaniya, İtaliya və Çexiya Respublika, 16 qılə təklif iroə doəşone iyən ğəror heste Oktiyabrə manqi 17 (Mehr manqi 25) minnə ruji iclosədə, tojə sanksiyaon barədə ,Avropa ittifoği xarıci vəzir bə ğərol bərəsi.
Həlbətə tojədən İroni daxıli vəziyəti barədə, Avropa ittifoğ, qıləy ğətnomə muntəşirış kardə ki İroni xarıci vəzarətxonə sıxənəvot, Nasır Kənani çəy barədə reaksiya nışoş do iyən ım ğətnomə botil və be erj zıneydə.
