Vəhdət konfrans, çı ğovmon miyono həmdıləti icod kardeyro qıləy ğədəm.

Dinon və məzhəbon universiti rəis, islami vəhdət beynəlxalğə konfransi bərpo bey, çı İronıjə ğovmon hamdıləti xususi sınnionro, qıləy təsirinə ğədəm zıneydə.

Məzhəbon və dinon universiti  rəis Sed ƏbulHəsən Nəvvab de İrna votımonədə islami vəhdət konfransiku bənə vəhdəti amil yodış kardə ki dəvardə 36 dıvrə mıddətədə, karde zınəşe İronıjə sınnion de co kişvəron rabitə icod bıko.

Hovzeye elmiyə ım ustad əlovəş kade: vəhdəti konfransi nəticəon həmişə mısbət be və hiç vaxt vəhdət baxşədə problem icod bıə ni əmmo deşmonon həmişə cəhdışon heste ta daveon bənə ğovmi və ğəbilə cəhəto muşkil nışo bıdən çən İroni ğovmon ki veyni sınnionku hest bəpe dəvardə zəmoniku vey vəhdət icod beyro, ım iclosonku istifodəşon bıbu.

Har sor iyən de vəhdət haftə həmzəman, İslami məzhəbon bə iyandı nez karde beynəlxalğə icma de Rəbiuləvvələ manqi 12 minnə rujiku tosə 17 minnə ruj, islamiyə vəhdət beynəlxalğə konfransi de İslam dınyo muhimmə şəxsiyəton iştiroki bərpo kardedə.

Imsor, ım konfransi iştirok baxşədə, 60 qılə kişvəriku 200 nəfər alim və 100 nəfər daxıli mədəni və siyasi şəxsiyət iştirokışon be.

Həmçınin ımsornə konfransi virtual baxş, Oktiyabrə manqi 9 minnə rujiku binə və 12 qılə virtual iclos de 144 qılə nıtği əncom bıə.

İslamiyə vəhdəti beynəlxalğə konfransi bərpo beyku hədəf, mısılmonon miyonədə vəhdət iyən həmrayəti icod bey, elmi və mədəni cəhəto alimon fikon bə yande nez kardey, məşvərət, iyən bə islami vəhdət dast peydo kardey xoto elmi hələkə roon edaşte, islam dınyoədə yeqanə umməti icod kardey, mısılmonon məsələon və muşkilaton həl kardey və həminə barədə mınosibə hələkə roon peydo kardeyku şomil bıdə.