Rəyisi: multilateralizm dınyo zuhuri prosses be hərəkət nibəbe.

İron İslam Respublika prezident təkidış karde: multilateralizm dınyo zuhuri prosses be hərəkət nibəbe.

Tehronədə bıə, Asiya və Okean aqentiyətion ittifoği umumiyə onemoni(OANA) 18 minnə iclosi bərpo bey zəmonədə, Sed İbrahim Rəyisi de Spotnik aqentiyəti votemonədə, bə multilateralizmə dınyo icod bey prossesədə, Amerkə bevəcə roli işorəş kade.

İron İslam Respublika prezident Sed İbrahim Rəyisi de Spotnik aqentiyəti votemonədə votışe: fəğət ğərbi kişvəronin ki de multilateralizmi dınyo icod bey, ıştə muxalifəti nışo dodən, aqəçı ım prosses huç vaxt be hərəkət nıbəmande.

Rəyisi ijən əlovəş karde: ğərbi dınyoku xarıc vey ğudrəton mucudin, tojə dınyo de məntəğə təşkilaton royku bənə Şanxay həmkoəti təşkilati icod bəbe.

İroni prezident həmçınin bə de Rusiyə həmkoətion zumand kardey işorəş karde iyən votışe: de Rusiyə rabitəon bə inkişof rosniye ciddi qətedəmon, və İron bə ozodi bəfodor bıə millətonku himoyədorəti dəvom bədoe.

Rəyisi ıştə sıxənon dəvomədə əlovəş karde: Amerkə plan ki bə kişvəron sanksiyaon əncom doey royku be, ısət məğlub bıə, jəqo ki Amerkə həm fahmedə ki holihazırədə, sanksiyaon be təsirin, çən əvon bə co metodonku istifodə kardey meylışon bıə.

Rəyisi ijən votışe: ısət kiberi terrorizm, vey muhimmə ofət bə hisob omeydə.

İroni prezident təsdiğış karde: İronədə de Amerkə vositə, iğtişoşon icod bıə, əmmo ijən ım barədə Amerkə hisob-kitobon səhv be.