Qeneral Bağıri: şərğədə, qlobal zumandə ğutb icod bəbe.

İron İslam Respublika həmmə silohinə ğıvvon ğərorqoh yol bəyonış karde ki unilateralizmi metodi icod beyədə Amerkə muvəffəğ nıbe, əv ijən votışe: şərğədə, qlobal zumandə ğutb icod bəbe.

Bə İrna raporti əsos, İron İslam Respublika həmmə silohinə ğıvvon ğərorqoh yol qeneral Muhəmməd Bağıri de Rusiyə mudafiə vəziri beynəlxalğə muavin Qeneral Fomini vindemonədə 2 qılə kişvəri milli mənafe iyən hədəfon çərçivədə bə məntəğə, beynəlxalğ iyən  2tərəfiyə həmkoətion inkişofi təkid iyən əlovəş karde: ımruj Amerkə həm etırofış kardə ki unilateralizmi metodi icod beyədə Amerkə muvəffəğ nıbe və şərğədə, qlobal zumandə ğutb icod bey holədəy.

Əv ijən əlovəş karde: mıştərəkə mənafe baxşədə, de mıştərəkə təhdidon muğabilə kardey bə veyə məşvərəton ehtiyoce ki bəpe metodon dəvomədə həmkoətion inkişofiro diğğət bıbu.

Qeneral Bağıri ijən dəvomış do: Suriyədə və de terroriston mubarizə bardeyədə 2 qılə kişvər muvəffəğə həmkoətion icod bıə, həlbətə tosə bə ısət Suriyə kişvər bə ım himoyəon dəvomi ehtiyocışe.

Im vindemonədə, Rusiyə mudafiə vəziri beynəlxalğə muavin, ıştə kişvəri mudafiə vəziri dəvət rosnişe ki Qeneral Bağıriku dəvətış kardə Moskvaədə Şanxay təşkiloti uzv bıə kişvəron mudafiə təşkilotii yolon iclosədə iştirok kon, əv ijən ıştə umo nışoş do ki ım iclosədə Qeneral Bağıri iştiroki imkon icod bıə.

İronədə hərbi həmkoətion mıştərəkə kamissiya 4minnə iclosədə iştirokiro, Zinə rujədə Qeneral Fomin deştə ali heyəti bə ico bə Tehron varid bıə.