Əmirəbdullahiyan: de terror iyən vızməti mubarizə bardey, beynəlxalğə oşkoə məsuliyəte

İroni daxıli koonədə Almaniya mıdoxilə hərəkəton iyən sıxənon reaksiya barədə, İroni xarıci vəzarətxonə vəzir təsdiğış karde: terror, vızməti iyən nifrət icod kardey muğabilə kadey, beynəlxalğ oşkoə məsuliyətonku bə hisob omeydə.

Bə İrna raporti əsos, zinə İroni xarıci vəzarətxonə sıxənəvot sosiyol şəbəkəonədə, ıştə şəxsiyə səhifədə nıvıştəşe: Almaniya ıştə sərzəmin iyən əmniyyəti, bənə sıə xətt zıneydə, əmmo İronədə terror iyən vızməti de əbzori metodi rəvocış doə və çəvon ələyh İroni ğanuniyə mubarizə 2 diməti surətədə bevəc elan kardə.

Bə İron İslom Respublika ələyh ğeyri konstruktiv hərəkəton iyən İroni daxıli koonədə ım kişvəi mıdoxilə sıxənon iyən hərəkəton dumoədə, dəvardə haftəonədə tosə bə ısət, Tehronədə bıə Almaniya səfir, 2 kərə bə İron İslom Respublika xarıci vəzarətxonə vanq iyən rəsmiyə etıroz iyən nota bəy doə bıə.

Pencşəmbə rujədə Almaniya xarıci vəzir, İroni daxıli koonədə ıştə mıdoxilə sıxənon iyən İroni no oromətionku himoyədorəti kardey  dəvomədə bə edam məhkum bıə iğtişoşçi ki çəy canqəkə hıkm sadir bıə reaksiya nışoş do.

Bə İron İslom Respublika məhkəmə ğıvvə elani əsos, ım şəxs Sentiyabrə manqi 25 minnə rujədə Tehronədə qıləy xiyabani dəbastəş be və de siloh, kişvəri əmniyyəti mudafiəkə məmuronku qıləyni zəxminış karde, ın iğtışoşçi edam hıkm Dekabrə manqi 8 minnə rujədə icro bıə.