Əmirəbdullahiyan: İroniro Eko təşkilot vey muhimme

İğtisodi həmkoəti təşkiloti(Eko) təsisi 30minnə yolqətey mərosimədə İroni xarıci vəzir Huseyn Əmirəbdullahiyan təsdiğış karde: İroniro Eko təşkilot vey məxsusə vırəş heste iyən İron Ekoədə intiqrasiya prosseson zumand kardeyro har qılə fırsətiku istifodə kardedə.

Zinə İşəmbə rujədə və Tehroni beynəlxalğ iyən siyasi mıtoliəon mərkəzədə, İğtisodi həmkoəti təşkiloti(Eko) təsis sorəqardışi mərosim de Huseyn Əmirəbdullahiyan, Eko təşkiloti sərkatib, səfiron və rəsmi şəxson iştiroki bərpo bıə.

Bə İrna raporti əsos, ım mərosimədə, İroni xarıci vəzir votışe: de hamsuyəon, məntəğə iyən Asiya kişvəron iğtisodi həmkoətion hevujəti iyən nığıləti, çı İron İslom Respublika dıvləti iğtisodi diplomatiya vey muhimmə koon bə hisob omeydə.

Əv ijən votışe: ım strateqiyaədə, reqional iyən çand tərəfiyə təşkiloton bənə Eko vey muhimmə vırə soybin və çəvon vırə iyən roli zumand kardey bois bəbe məntəğə iğtisodi inkişofi hoston iyən 2tərəfiyə həmkoətion əlovə bıbun və ım məsələ İron İslom Respublika hədəfonku heste..

İroni xarıci vəzir ijən dəvomış do: əmə bovəmandimon ki Eko karde bəzne cənub-cənub həmkoətionədə muvəffəğə ulqo, tranziti kişvəron iyən hışkiədə mıhosirə bıə kişvəron, enerji məsrəfəkə iyən istehsoləkə kişvəron miyono, bə millət-mehvəri bıə həmkoətion xususi turizm baxşədə, universiti iyən elmi həmkoətion və tenoloqiya həmkoətion təklif bıdə.

Əv ijən təkidış karde: ım hədəfon bə vırə rəseyədə, əlovə bə uzv bıə kişvəron, Eko kotibəti iyən Eko təşkilati baxşon, iyən reqional və təxəssusi təşkilaton həm vey muhimmə rolışon heste.