Maskvaədə Şəhid Suleymani yod karde məxsusə mərosim
Bə şəhid qeneral Ğasim Suleymani şəhodəti 3 minnə sorəqardışi xoto İronıjə ğəhrəmon nomo məxsusə iclos Maskvaədə bərpo bıə.
Bə İRİB raporti əsos, zinə şəvi məxsusə iclos de ASPİ məzhəbi onemoni və de RUSAR xəyə fundi həmkoəti iyən İroni şahrvandon və rəsmi şəxson ijən məsihi alimon və koşınason iştiroki bərpo bıə.
Həminə iclosədə Rusiyədə bıə İroni səfir Kazim Cəloli, şəhid Suleymani bənə de terrorizm mubarizə bardə vey yolə şəxsiyəti bə hisobış varde iyın bə ın yolə ğəhrəmoni ğatilon rə cəzo doe təkidış be.
Əv votışe: ın cinoyət har zəmoniku vey nışoş do ki kom kəson de terrorizm mubarizə bardero ciddin və kom kəson iddo kardən.
İroni Sepahe Ğuds təşkilati nakonə fərmondə Qeneral mayor Ğasim Suleymani ki de İraği dıvləti rəsmi dəvəti miladi 2020-ə sori Yanvari 3 bə ım kişvər səfərış kardə be, Bəğdad airporti ətrofədə de Amerkə terrorist iyən təcavuzkorə ğıvvon həvo həmləon, de İraği Həşdu-Şəəbi muğavimət təşkilati muavin Əbu-Məhi-Əl-Muhəndis iyən 8 nəfər çı muğaviməti co rəzməndəon bə bahəm şəhid be.
