İron və Tacikistoni rəsmi şəxson bə ədəbiyot və mədəniyəti mıştərəkə diplomi nıvıştey təkid
İron İslom Respublika yolə luğətnomə mərkəzi yol de Tehronədə bıə Tacikistoni səfiri vindemonədə, 2 qılə kişvəri elmi təşkiloton miyono həmkoəti icod kardey təğib bıbu.
Bə Fars aqentiyəti raporti əsos, Tehronədə Tacikistoni səfir, Nezamuddin Zahedi iyən İroni yolə luğətnomə mərkəzi yol, Kazım Musəvi Bucnordi 2 qılə kişvəri elmi təşkiloton miyono həmkoəti hevujəti barədə iyən mıştərəkə elmi planon əncom doeyro xususi İron və Tacikiston miyono mədəniyət, torix, zıvon və ədəbyoti mıştərəkə diplomi nıvıştey barədə təkidışon kardə.
Bə həminə raporti əsos, İronədə bıə Tacikistoni səfir, 6 cild mədəniyəti luğətnomə bə İroni İslomiyə yolə luğətnomə mərkəz təğdimış kardə.
Hiç qılə kişvər bə İron İslom Respublika miğdor bə Tacikiston nez və dılbastətiş ni və çəy illət həm bə 2 qılə kivşəri milləton irğçiyəti, torixi, mədəni, dini və zıvoni əloğəon xotoe.
İron İslom Respublika xarıci siyasətədə həm Tacikiston barzə vırə soybe iyən İslomiyə İnğilobi Yolə Rəhbər 2 qılə kişvəri rabitəonku bə xışavəndi rabitəon yodış kardə.
İron İslom Respublika iminnə kişvəronku be ki Tacikistoni dıvləti istiğloli rəsmi zıneydə və iminnə kişvər be ki Dışəmbə şəhrədə ıştə səforətxonə binoş kardə.
