Rəyisi: Fələstini milləti həx-huğuğonku himoyə kardey əvəz kardənin ni

İron İslom Respublika Prezident votışe: Fələstini milləti həx-huğuğonku himoyə kardey iyən de sionist rejimi mubarizə bardey, islomi umməti strukturədə əvəz nıbıə prinsip iyən de sionist rejimi cinoyəton vədə muğabilə kardeyro, islomi qlobal vəhdət qıləy əbədiyə zərrurəte.

Bə prezidenti məlumatərosnə mərkəzi raporti əsos, Pencşəmbə rujədə, İron İslom Respublika prezident Seyd İbreym Rəyisi de İndoneziya prezident Coko Vidodo telefoniyə votımonədə Fələstini ısətnə vəziyət bəyonış kardə və ım kişvəri bənə İslom dınyo vey muhimmə dıl zınəş və Fələstini məzlumə millətiku mudafiə və de sionist rejimi cinoyəton muğabilə kardeyro, mıştərəkə bə ğərol oməyon və islomi həmkoəti vey rə iclosi bərpo bey tələbış kardə.

İron İslom Respublika prezident ijən təsdiğış karde: qlobal hisob-kitobonədə, İslom dınyo bənə qıləy təsirinə bloka bə inteqrasiya vey ehtiyocış heste və bə həminə əsos, islomi kişvəron miyono rabitəon nığıləti cəhətədə, harcurnə təşəbbusiku himoyə kardedə.

Rəyisi həmçınin bə Tehron-Cakarta 70 sornə diplomatiya rabitəon işorəş iyən bə 2 qılə kişvəri ticori rabitəon və iğtisodi həmkoətion zumandəti təkidış kardə və ıştə umo nışoş do ki 2 qılə milləti mənafe və rifoh cəhətədə İron və İndoneziya həmkoətion tojə sorədə vey çəşəçi hevuj bəbe.

İndoneziya prezident Coko Vidodo həm Hicri Şəmsi tojə sor və Rəməzan mıburəkə manqi dəme mınosibəti bə İroni millət təbrikış votışe və 2 qılə milləti nez bey və mıştərəkə mənafe təmin kardey cəhəto, bə 2 qılə kişvəri rabitəon nığıləti təkidış kardə.

Həmçınin İndoneziya prezident islomi həmkoəti təşkiloti zəruriyə iclosi bərpo beyro, İron İslom Respublika təklifiku himoyətış kardə və ıştə umo nışoş do ki ım iclos bərpo bey islomi kişvəron miyono rabitəon vey zumand kardey zəminəon icod bəkay.