İron və Tırkəməniston deyande xışavəndin iyən veyə mədəni mıştərəkəçiyon soybin
İslomi İnğilobi Yolə Rəhbər de Tırkəmənistoni xalğ məsləhəti şura yoli vindemonədə, İron və Tırkəmənistoni deyande xışavənd və veyə mədəni mıştərəkəçiyon soyb bıə kişvər zınəşe və hamiyəşe: ım mədəni mıştərəkəçiyon dəvardəku vey muxtəlifə baxşonədə xususi enerji və roy baxşonədə həvujətiro vey muhimmə zəminəon icodəkəy.
Bə İran Peres aqentiyəti raporti əsos, zinə çoşəmbə əsrədə, İslomi İnğilobi Yolə rəhbər Həzrəte Ayətullah Xamenei de Tırkəmənistoni xalği məsləhəti şura yol, Ğurbanğoli Bərdi Muhəmmədevi vindemonədə, İron və Tırkəməniston deyande xışavənd və veyə mədəni mıştərəkəçiyon soyb bey zınəşe iyən təkidış kardə: ım mədəni mıştərəkəçiyon dəvardəku vey muxtəlifə baxşonədə xususi enerji və roy baxşonədə həvujətiro vey muhimmə zəminəon icodəkəy.
Ə Həzrət İron və Tırkəmənistoni marzi neziku tosə Kaspi dıyo, qıləy maqistral soxtey cəhəto, İroni koşınoson və mıtəxəssison iştirokiro bə Tırkəmənistoni xəlği məsləhəti şura yoli tələbi işorəş kardə və hamiyəşe: İroni roy vəzorətxonə həminə maqistrali soxtey zuş heste, həmçınin de diğğət bə qlobal iğtisodədə reylz və zəmini rabitəon vey muhimmə vırə, şimol bə cənub tranziti roy komil kardeyro əmə veyə irodə soybimon, ım roy karde bəzne Tırkəməniston və çəy ətrofədə bıə kişvəron bə Omani dıyo dəçokno.
İslomi İnğilobi Yolə Rəhbər, rabitəon hevuj kardey bə 2 qılə kişvəri mənafe əsos zınəşe və bə vəoməy rabitəon ıştə umu nışoş do iyən təkidış kardə: İron İslom Respublika və Tırkəmənistoni veyə həmkoətion təhəvolinə dınyoədə, 2 qılə kişvəri vırə inkişofi zəminə bəbe.
İslomi İnğilobi Yolə Rəhbər ijən 2 qılə kişvəri Ətrak və Cihun ruon məsofədə bə çand nəfər məşhurə alim və şəxsiyət və həmçınin İronədə bə Tırkəmənə məşhurə şair Məxtumğoli Fəraği məzari vucudi işorə və əlovəş kardə: bəpe bə ım mədəni zəminəon diğğət bıbu.
Im vindemonədə ki nizomi məsləhəti təyinədə təşkiloti yol, Ayətullah Amoli Laricani həm iştirokış be, Tırkəmənistoni xəlği məsləhəti şura yol, Ğurbanğoli Bərdi Muhəmmədev de İslomi İnğilobi Yolə Rəhbəri vindemoniku ıştə rizoyəti nışoş do və votışe: dəvardə soronədə iyən ıştə prezidenti devronədə və bə İron çımı səfəon cərəyonədə, az həmişə şımə tovsiyəon iyən vindemononku istifodə kardəm be və bə həminə tovsiyəon vey muhimmə koon əncom dodəm, ım vindemonədə həm Tırkəmənistonədə vey yolə planon əncom doeyro şımə tovsiyəon istifodə kardey dumoədəm.
Əv bə de İroni rəsmi şəxson muzakirəon işorə və təkidış kardə: ım muzakirəonədə həmkoətion hevujətiro xususi ov, ruşəna və qaz baxşon iyən ro soxteyədə İroni koşınoson və mıtəxəsison zumandətiku istifodə kardeyro, vey çokə təvafuğon əncom bıə.
