Bə atomiyə sənaye bumi beyro, İslomi İnğilobi Yolə Rəhbəri təkid

İslomi İnğilobi Yolə Rəhbər Həzrəte Ayətullah Xamenei bə atomi vey muhimmə sənaye bumi bey təkidış kardə.

Bə İrna raporti əsos, İşəmbə rujədə İslomi İnğilobi Yolə Rəhbər atomi sənaye rəsmi şəxson, koşınoson, mıtəxəssison və alimon vindemonədə milləti jimonədə atomi sənaye inkişofon təsiri hiss beyro bə həmmə cəhdon təkidış kardə və hamiyəşe: atomi vey muhimmə sənaye bumi bey, ğərbi məğlubiyət və bə ğərbi meyl bıə kəsoni təhğir bey nışonəy, həmonə kəson ki kişvərədə umu və ko rohiyə zəifəti və milləti təhğir kardey dumoədən.

İslomi İnğilobi Yolə Rəhbər, İronədə atomiyə siloh istehsoliku tarsi barədə ğərbi iddio du zınəşe və əlovəş kardə: əvon ıştən zıneydən ki əmə atomi siloh dumoədə nimon, jəğo ki Amerkə kəşfiyot ictima çand kərə əcumlə dəvardə manqonədə bə ım həğiğət etırof kardəş be ki hiç qılə nışonə mucud ni ki subut bıko İron bə atomi siloh soxtey səmt hərəkət kardey holədəy.

Həzrəte Ayətullah Xamenei kutləvi məhvəkə siloh( həm atomi və həm kimyəvi) istehsol kardey de İslomi muxalif zınəşe və əlovəş kardə: ehanə ım islomi əsos nıbe və əmə atomi siloh istehsolədə irodəmon be, əmə ım ko əncom doə bim və deşmonon həm bıznon ki karde zınəşon nıbe çəmə irodə vəy bıqəton.

İslomi İnğilobi Yolə Rəhbər de İroni milləti inkişofi muxalif bey vey həğiği və muhimmə illəte ki deşmonon de İroni atomiyə sənaye muxalifin. əv ijən hamiyəşe: ım sənaye, muxtəlifə baxşonədə, millət və kişvəri çəşəçi inkişofi kilide, qıləy holədə ki deşmon tarsedə ki co milləton İroni inkişofi roy və fikiku ulqu bıqəton.

Ə Həzrət ıştə sıhbəton dəvomədə hamiyəşe: dəvardə soronədə atomi tərəfon və təşkilaton vey vəədəon doəşon be ki əməli nıbıə və əmə dərəsəmone ki bə kom kəson iyən kom vırəon bəpe etımo bıkəmon ya etımo məkəmon, ım məsələ dərəsey millətiro vey muhimme, ijən ki bə ım məsələ diğğət nıkardey vey baxşon və hissəonədə bə zərəl-ziyon varid kardəş.

Həzrəte Ayətullah Xamenei dınyoədə de məşhur və kamə zərfiyəton vositə, stansiya soxtey vey zəruri zınəşe və hamiyəşe: muxtəlifə baxşonədə kişvər bə jığonə stansiya ehtiyocışe.

Ə Həzrət də təkid bə ım ki atomiyə enerji təşkilot bəpe mığobilə tərəfon zuə tələbon və pesoxtə bıə iddion vədə muğavimət ko ijən əlovəş kardə: nə zılmə sıxənon və tələbon ğəbul kənən və nə pesoxtə bıə sıxənon.