Rəyisi: İron inkişofiro, təhdidon bə fırsət əvəz kardedə

İron İslom Respublika prezdent işorəş kardə ki Amerkə pidəş be de təhdid və sanksiya İroni milləti be hərəkət ko, əv ijən təsdiğış kardə: İroni millət təhdid və sanksiyaku, ıştəniro fırsət icodış kardə və bə inkişof rəsə.

Çoşəmbə sıb, İron İslom Respublika prezdent bə Veneesuela ıştə səfə sə kardey bəpeşt, de Nikaraque rabitəon inkişof kardey hədəf bə Manaqoa varid bıə.

Bə Prezdenti məlumatrosniyə mərkəzi raporti əsos, İron İslom Respublika prezdent Seyd İbreym rəyisi Nikaraque prezdent Daniel Ortqa rəsmiyə və beşey mərosimi bəpeşt, ım kişvəri kali cıvonon cəmədə bə İroni İslomi İnğilob və Nikaraque səbarzəti həmzəmon bey və ım 2 qılə inğilobi mıtəğabilə təsiri işorəş kardə və 2 qılə kişvərədə de Emperyalizmi mubarizə bardey milli ğəhrəmononku ğədrdonətiş kardə.

Rəyisi  istiğlol tələbəti, ozodi tələbəti və ədolət tələbəti İron və Nikaraque milləti inğilobon mıştərəkə çiyon elan və əlovəş kardə: həmmə baxşonədə xususi elm və texnoloqiya baxşonədə 2 qılə kişvəri miyono inkişofiro İron hozzoe.

İron İslom Respublika prezdent ğərbi bəşər həxon və demokratiya iddion həm du zınəşe və votışe: ğərbion xususi Amerkəvıjon bəpe bə milləti əsos bıə nizomon ehtırom bınən əmmo çəy əksədə əməl kardedən.

Rəyis həmçınin DAEŞ-i icod kardeyədə bə Amerkəvıjon rol iyən de terrorizm mubarizə bardeyədə bə İron İslom Respublika siyasət işorəş kardə və votışe: əvon de terrorizm mubarizə bardey iddeoşon heste əmmo de terrorizmi mubarizə bardey ğəhrəmon yəni Hac Ğasım Suleymani şəhid kardışone.

Im mərosimədə həmçnin Nikaraqoe prezdent, Daniel Orteqa bə İron və Nikaraqoe inğilobi həmzəmoni işorəş və təsdiğış kardə: 2 qılə kişvəri inğilob de sultə tələbon xususi Amerkə mubarizə bardey royədə zumandə rişəon soybe ki həmişə bə co kəson ıştə tələbon icbor kardey dumoədən.

Nikaraqoe prezdent həmçınin 2 qılə kişvəri milli ğəhrəmononku ğədrdonətiş kardə və Hac Ğasım Suleymani şəhid kardeyədə Amerkə cinoyəton məhkumış kardə. və ıştə sıxənon de İron bəji bımando və Ğasım Suleymani yodi bəji bımando şuar bə oxo rosnişe.