Rəyisi: xarıcion mıdoxilə fəğət məsələon vey mırəkkəb kardedə

İron İslom Respublika prezdent de Ermənistoni xarıci vəziri vindemonədə Erməniston və Azərbaycan Respublika miyono sulh muzakirəonku Tehroni himoyə elan və təkidış kardə: xarıcion mıdoxilə fəğət məsələon vey mırəkkəb kardedə.

Zinə Dışəmbə Ermənistoni xarıci vəzir Ararat Mirzoyan de İron İslom Respublika rəsmi şəxson vindemon və məşvərət kardeyro bə Tehron varid bıə.

İron İslom Respublika prezdent Seyd İbreym Rəyisi Ermənistoni xarıci vəziri vindemonədə votışe: xarıcion mıdoxilə fəğət məsələon vey mırəkkəb kardedə və İron İslom Respublika, Erməniston və Azərbaycan Respublika miyono sulh muzakirəonku ıştə himoyə elan kardedə və umuş heste ki ım muzakirəon har çəxtə məntəğədə sulh, əmniyyət və oroməti zumandəti iyən əlovə bey bois bıbu.

Bə İrna raporti əsos, prezdent həmçınin bəyonış kardə: İron İslom Respublika hiç vaxt məntəğə kişvəron marzon və qeopolotiya əvəz bey ğəbul nıko və əlovəş kardə: İron, məntəğə həmmə kişvəron ərzi təmamiyyət və hakımiyət həxiku himoyə kardedə.

Rəyisi ijən bə 2 qılə kişvəri rabitəon səth har çəxtə inkişşofi təkid və əlovəş kardə: İron İSlom Respublika de Ermənistoni vədə rabitəon hevujətiro hiç qılə mane vindəş ni.

Im vindemonədə həmçınin Ermənistoni xarıci vəzir Ğəfğazi məntəğə təhəvulaton vədə, İroni nəzəonku ğədrdonəti və təsdiğış kardə: Erməniston hiç vaxt anti İroni hərəkəton zəminəon icod nıko və həmişə bə məntəğə əmniyyət və oroməti hevujəti təkid kardedə.

Ermənistoni xarıci vəzir de İron İslom Respublika rabitə bərğəror kardey ıştə  kişvəriro vey muhimm zınəşe və bə 2 qılə kişvəri miyono diplomatiya rabitəon əlovə bey və nığıləti təkidış kardə.