Fələstini millətiku himoyə kardey, İslom dınyo vəhdətəbaxşə vey muhimmə amile

İslamiyə məzhəbon miyono təğrib beynəl xalğ təşkilati sərkatib təkidış kardə: Ğuds və Fələstini millətiku himoyə kardey, İslom dınyo vəhdətəbaxşə vey muhimmə amile.

Oktiyabrə manqi 7minnə rujədə Fələstini muğaviməti qrupon sionist rejimi şərrə koon cəvobədə, işğol bıə sərzəminonədə həmmə curnə iyən mislış nıbıə əməliyoton bino kardışone ki işğolçiyon 75 sornə omrədə mislış nıbe və ım həmləon həmçınan dəvomış heste.

Bə Ğəzzə tanqə de Ğudsi işğolçiyə rejimi həmləon dəvomi həmzəman, Fələstini səhiyyə vəzorətxonə elanış kardə ki bə sionist rejimi həmləon xoto, 1500 nəfəriku vey şəhid və 7200 nəfəriku vey həm zəxmin bıən.

İslamiyə məzhəbon miyono təğrib beynəl xalğ təşkilati sərkatib Huccətul İslom vəlmuslemin Həmid Şəhriyari votışe: Fələstini məsələ iyən muğavimət, İslom dınyoədə mısılmonon iyən nez bey vey muhimmə vəhdətəbaxşə votımoni mehvəre ki Fələstini muğavimət vey çok meydonədəy.

İslamiyə məzhəbon miyono təğrib beynəl xalğ təşkilati sərkatib ijən əlovəş kardə: sionist rejim bə tənəzul bəşey holədəy və çəy məhv bey vey rə əncom bəbe və şoyid bəbemon ki Ələğsa Tufani əməliyot həm ım rejimi rişəon məğlubiyəti nışoş do.

Şəhriyari ijən votışe: bəpe Fələstini məsələ həmişə yodədə bımando və zərurie ki İslom dınyo vey muhimmə məsələ bımando v Şərifə Ğudsi ozodiro mısılmonə milləton cəhd kon.

İslamiyə məzhəbon miyono təğrib beynəl xalğ təşkilati sərkatib ijən əlovəş kardə: HƏMAS deştə əməliyoti vositə subutış kardə ki Fələstini nicot de islomi həmmə kişvəron həmə tərəfiyə himoyə imkonış heste.