Əmirəbdullahiyan: dınyo, bə Ğəzzə milləti ələyh sionist rejimi cinoyəton şoyde
İron İslom Respublika xarıci vəzir, de Cənubi Afrika xarıci vəziri mıştərəkə xəbəiyə iclosədə təkidış kardə: ımruj dınyo bə Ğəzzə milləti ələyh apartayd və hırdən əkıştə rejimi cinoyəti şoyde.
Cənubi Afrika xarıci vəzir Naldi Pandro ki zinə deştə ali heyəti bə ico bə Tehron varid bıə de İroni xarıci vəzir Huseyn Əmirəbdullahiyan vindemon və votımonış kardə.
Im vindemoni bəpeşt, 2 tərəf xəbəiyə mıştərəkə iclosədə iştirok kardşone ki ım iclosədə Əmirəbdullahiyan votışe: ımruj əlovə bə 2tərəfiyə mevzoon, Ğəzzə təhəvvulaton iyən çəy məsələon barədə həm votımon kardımone və de sionist rejimi apartayd mubariz bardey və Fələstini millətiku himoyə kardeyədə Cənubi Afrika nəzəonku təşəkkur kardedəmon.
Bə İrna raporti əsos, ım iclosədə İroni xarıci vəzir votışe: bə Cənubi Afrika prezdenti dəvəti əsos, İroni prezdent, Seyd İbreym Rəyisi bə Cənubi Afrika səfə bəkay iyən ım səfədə, 2tərəfi təşkilaton miyono oxonə sənədon de 2 qılə kişvəri prezdenton vositə imzo bəbe.
Əmirəbdullahiyan de işorə bə işğoliyə sərzəminon təhəvvulaton votışe :Amerkə prezdent, Co Bayden təcili holət bə Telaviv şeydə və sionist rejimiku ki bə ğeyri hərbi milləton, noxəşxonəon və sakin bıə mərkəzon həmlə kardedə mudafiə kardedə və rəsmi surət elan kardedə ki Ğəzzə milləti ğətli-amiro çand sa təyyorə vığandedə və qıləy təhğiromizə cumlə ğolibədə voteydə bə Ğəzzə humanitarə koməkonro 20 qılə bo maşin vığandımone.
İroni xarıci vəzir ijən təsdiğış kardə: ımruj Amerkə bə Ğəzzə milləti ələyh bə vəkoləti canq varid bıə və bəpe voteydəmon ki ımruj məntəğə baruti barele və har curnə ğələtə hisob-kitob, Ğəzzə etosniye və çəy milləti icbor surəti bə co qılə kişvəron vığandey karde bəzne məntəğəro iyən canq icod kardə kəsonro bevəcə nəticəon bois bıbu.
Əmirəbdullahiyan ijən təkidış kardə: bə Amerkə iyən sionist rejim nota domone ki ehanə təcili surət Ğəzzədə bə bəşəriyəti ələyh cinoyəton be hərəkət nıkon, ehtımolış heste ki məntəğə kontrol dastiku xarıc bıbu.
