Nəhcul-Bəlağə pand iyən hikməton

Nəhcul-Bəlağə pand iyən hikməton

Və ğalə Əli(ə)” ğıymətu kulli imriin ma yuhsinuhu -hakəsi ğıymət və erj çəy çok-çoki əncom doə koy əndozədəy”.

Əmirəl-Muminin Həzrət Əli(ə) Nəhcul-Bəlağə həşto iminə kuto iyən erjinə hikmətədə çe har qıləy insoni erj və ğıyməti de ruşinə formə  bəyon kardedə və hamyedə:”hakəsi ğıymət və erj çəy çok-çoki əncom doə koy əndozədəy”.

Çoko ki,şımə zıneydon har qıləy erjış heste.məsələn çe oləti erj çəy keyfiyyət iyən cinsədəy.çe miyvə və ləl-qıli ğıymət çəy rəsey iyən xoşə təmədəy.çe puli erj və ğıymət çəy mərkəzi bankədə bıə dastəke.əmmo çe insoni erj kom çiyədəy?aya iləs ki,qıləy boho ğıymətinə olət bə tan kardedə,çəy erj ziyod iyən barz beydə?.aya çe mobil telefon ya ğıymətinə maşin bəçəy soybi vey ğıymətin bıey səbəb bəbe?.

Əmirəl-Muminin Həzrət Əli(ə) bın erjinə hikmətədə bə insoni erj noey meyaronku bəhs kardedə və hamyedə:çe hakəsi ğıymət və erj çəy çok-çoki əncom doə koy əndozədəy.yəni qıləy idorə koəvon ki,ıştə koy çok-çoki bə vırə rosneydə ya qıləy zumandə doktor ıştə koy vey şokə şikilədə əncom doydə və səy kardedə ıştə ko və ixtisosiku bo noxəşi vey çok bıeyro oko bıdo.qıləy mellim ki,ıştə qırd səyon və cəhdonku oko doydə ta çe şoqirdon məlumoton və aqahəti ziyod bıbu.qıləy mahirə fəğih iyən dini alim ki,milləti de İlahi hukmon oşno kardedə və çəy barzə səviyyədə qıləy erjış heste.Xıdovəndi nəzdədə həm çə kəson erj iyən ğıymətışon heste ki,boştə əməl iyən rəftoron vey çokə formədə əncom doeyro ziyodə səy və cəhdon əncom doydən.

Nəhcul-Bəlağə şarih və şərhonku kali bo ın hikməti co qılə təfsiron həm nışonışon doə.bəziyon votedən ki,çe “ma yuhsinuhu”-ku murad və məğsəd şəxsi malik bıə elm iyən zıneye.binobərin çe har qıləy insoni erj və ğıymət  çəy elm iyən mərıfəti mığdorədəy ki,əvış çok-çoki omutəşe və bə dastış vardə.kali qıləyniyon votəşone ki,”ma yuhsinuhu”- çe ehson iyən çokə ko əncom doey mənoədəy və çe harkəsi erj çəy ehson iyən çokə koon əndozə və mığdorədəy.

In ğəşənqə hikmət  həyğətədə inev insoni bə çokə koon əncom doey səmt  qıləy təşviğe və ın məfhumi bəmə rosneydə ki, insoni qıləy həyğiyə kəromət iyən mənzilətış heste ki,çəy əməlon bə aqahəti iyən elmi əsos və deçəy qırd ğudrət iyən zu əncom doey beydə.

Nəhcul-Bəlağə cəməkə yolə mıfəssır iyən fəğih mərhum seyd Rəzi,çın hikməti bəyoni bədiqə qıləy cumləş bəyon kardə ki, nışon doydə ta kom əndozədə ın həkimonə sıxan bə ərəbi ədəbiyyoti barzə ustodon dıl iyən coni təsirış noə və əv çın hikməti dəvomədə jıqoş nıvıştə:ın cumlə ə umlə kəlomonkuye ki,boəy qıləy ğıymət təsəvır kardey mumkin ni iyən hiç qıləy həkimonə sıxan çəy həmvəzn bıey əzıni və hiç qıləy sıxan çəy həmrestədə ğərol qətey əzıni.