Nəhcul-Bəlağə pand iyən hikməton

Nəhcul-Bəlağə pand iyən hikməton

Və ğalə Əli(ə)”kanə filərzi əmanani min əzabillah və ğad rufiə əhəduhuma...

Əmirəl-Muminin Həzrət Əli(ə) Nəhcul-Bəlağə şərifə kitobi həşto həştminə hikmətədə jıqo hamyedə:”zəmini piyo İlahi əzobiku dıqlə əmonə vırə iyən nicoti vəsilə mevcudbe ki,çəvonku qıləyni peqətə bıə.şımə dıminə qıləyniku dəçıkənən və bəy çanq bıjənən”.İmom Əli(ə) ıştən çın kəlomi şərhədə ki,çe Ənfali mıborəkə surə 33-ə şərifə ayəku qıləy istibote,işorə kardedə və hamyedə:”əmmo qıləy əmon ki,peqətey be,çe Xıdo Rəsuli(s) vucud be ki,Xıdovənd deçəy vucudi bərəkəti hiçvaxti əzobış bə ın umməti nozilış nıkarde.əmmo əv çəmə miyono şe və əqlə mandə əmon istiğfore.çoko ki,Xıdovənde-Mutəol hamyedə:”vəma kanəllahu....çanədə ki tı çəvon miyonoş,Xıdovənd əvoni əzob nibəkarde və çanədə ki,əvon ıştə qınonku istiğfor kardedən, Xıdovənd bəvon əzob nibəkarde”.Nəhcul-Bəlağə şərifə kitobi qırdə kardə mərhum Seyd Rəzi çın hikməti bəyoni bədiqə əlovə kardedə:”və haza min....çe İmomi(ə) ın istinbot çe həmməysə çokə istifodəon nımunəonku iyən çı Kərimə-Ğıroni ayəonku istinboton həmməysə veyə lətifə qıləyniye”.

İstiğfor yəni İlahi məğfırət iyən baxşeşi tələb kardey mənoədəy və bo tobə iyən bə Xıdovəndi səmt oqardemoniro qıləy mığəddimə iyən vəsəy.qıno insoni bə kəmoli ovc iyən pik noxtə rəseyro oqəteydə.qınonku har qıləyni bə insoni mənəviyyot iyən rufi və bəçəy vucudi səfo qıləy zərbə daxil kardedə.joqo ki,çe rufi şəffofəti çe miyoniku bardedə və əy çəy ıştən təbiiyi və fitri holiku xaric kardedə.de qıləy co iborəti qıno bə insoni vucudədə bıə və əy çın maddi aləmi heyvoniku co kardə mənəvi cəhəton iyən tərəfon qıləy ziyon rosneydə və əy bə heyvonat iyən cəmodati nez kardedə və co tərəfiku həm bə Ənbiya mıborəkə surə 107-ə şərifə ayə mıtobiğe ki, hamyedə:”vəma ərsəlnakə....yəni Xıdo pəyğombər(s) bo təmom aləmonro vığandə bıə qıləy rəhməte.binobərin çanədə ki,İlahi ın rəhməti mərkəz şımə umməti miyonoe,Xıdovənd əvoni əzob nibəkarde.co tərəfiku həmçinin istiğfor Xıdo rəhməti cəlb kardey vəsilə iyən vositəonku qıləyniye.zira Əv,ıştən ıştə bandəon bo istiğfor kardey dəvət kardedə və çe ğufron iyən baxşeşi və`dəş doə.joqo ki,Zuməri mıborəkə surə 53-ə şərifə ayədə jıqoş hamyə:”ğul ya ibadiyəlləzinə.... vuji:”ha çımı bandəon ki,bəştə sıtəm kardəyone!Xıdovəndi rəhmətiku məyus məbən ki,Xıdo həmmə qınoon bəbaxşe.zira Əv,vey əbaxş iyən mehribone”.

Binobərin Xıdo pəyğombəri(s)rehləti bəepştə mısılmınon ıştəni de tobə iyən istiğfori vəsilə İlahi əzobiku əmonədə oqətey bəzıneyn və İmom(ə) bın hikmətədə həm bə ın ko təkid kardedə. mərdum bın zəmonədə nəyinki,İlahi əzobiku əmonədə mandey bəzıneyn,bəlkəm de istiğfor iyən tobə çe rəhmət,nemət iyən hərəbaxtəti bəon bəştə dimi oj kardey həm bəzıneyn.çoko ki,Nuhi mıborəkə surə 10-12 şərifə ayəonədə omə:”istəğfiru rəbbəkum,innəhu kanə ğəffara.....az bəvon votıme ıştə pərvərdıqoriku istiğfor tələbkənən .Əv,vey əbaxşe tayinki,çe osmoni bərəkəti voşon dumo yənde boşmə bıvğando və bəşımə de ziyodə mol iyən fərzəndon koməqko və havzə boğon iyən cari bıə nəhron şımə ixtiyorədə ğərol bıdo”.

Bəle bə Kərimə-Ğıroni ayəon iyən bə Əmirəl-Muminini(ə) kəlomi əsos çe insonon əməlon de aləmi vucudi hodisəon miyono mıstəğim iyən sərostə formədə qıləy irtibot iyən əloğə mevcude. yəni pəsəndidə iyən çokə əməlon bə bərəkət iyən xeyraton və nopəsənd iyən yavə əməlon həm bə bəlo iyən həlokəti nozil bıey boyis beydə.