Muhərrəmə manqi rujonədə Pokistonədə İslomi vəhdəti təcəlli
De Muhərrəmə manqi əzodorətion bino bey ki İslomi ictima miyonədə və Pokistoni co qılə məzhəbon tərəfdoron miyonədə vey barzə vırə soybe, Pokistoni rəsmi şəxson ım rujon və əyyomi yolqəteyro muxtəlifə mesajon muntəşir kardışone.
Bə İrna aqentiyəti raporti əsos, Pokistoni prezdent Asef Əli Zərdari və Çəy iminnə vəzir Şəhbaz Şərif bə Ğəməri tojə sor iyən Muhərrəmə manqi mınosibəti xoto de muxtəlifə mesajon vositə, bə İmom Huseyn(ə) və çəy əshabon ehtırom noey və bə çəvon şəhodəti erj noey bəpeşt, Aşura hodisə bə boteli ələyh həxi canqi nışonə bəyonışon kardə.
Əvon təkidışon kardə: Həzrəte Seyeduşşuhəda(ə) iyən çəy muğəddəsə əhle Beyt İslomi erjonku mudafiə kardeyro ıştə erjinə conon fido kardışone və ım fidokorəti və isor bəpe vəhdət, ədolət və de zılmi vədə mubarizə bardeyro həmmə mısılmonon ulqu bıbu.
Dəvardə rujonədə Pokistonədə muxtəlifə icloson və konfranson bənə Muhərrəmə manqi ehtırom noey, İmom Huseyn(ə)-i ğiyomi təbyin kardey və de mıştərəkə deşmonon xəbisə planon mubarizə bardeyro ictima vəhdəti zərurət unvani bərpo be.
