Rusiyə: Amerkə, israili həmləonku aqah be

Rusiyə xarıci vəzir, Livani Hizbullah sərkotibi terrorədə, Amerkə de israili etosniye rejimi hamdasti kardey mıttəhəmış kardə.

Ğəzzə tanqədə canq və cinoyətiku təğribən 1 sor dəvardey bəpeşt, ijən sionist rejim dəvardə Dışəmbə rujiku bə Livan ıştə cinoyəton əlovəş kardə iyən Sentyabrə manqi 27 Cımə rujədə ıştə tojə cinoyətədə və Beyruti cənub, Zahiyə bombardımoni dumoədə Livani Hizbullah sərkotib, Seyd Həsən Nəsrullah şəhidış kardə.

Bə Raşatodey xəbəiyə kanali raporti əsos, Rusiyə xarıci vəzir Serqey Lavrof, Livani Hizbullah sərkotib Seyd Həsən Nəsrullah tarsoəti terrori məhkum kardey bəpeşt votışe: bo anti Livani terroristiyə həmlə əncom doeyro, Amerkə, sionist rejimi bərnoməonku aqah be.

Rusiyə xarıci vəzir ijən təkidış kardə: ım həmlə mırrəkəb iyən çəy xısusiyəti barədə ğərbi mediyaonədə  muntəşir bıə ki nışo doydə bo ım cinoyəti əncom doeyro sionist rejimi dırozə hozzoətionədə Vaşinqton həmkoətiş be.

Lavrof ijən Hizbullah sərkotib, Seyd Həsən Nəsrullah terrorədə ım rejimi hərəkət və siyonist rejimiku himoyə kardeyədə bə Amerkə prezdent Co Baydeni bəyoniyə işorə və təsdiğış kardə: ə çi ki Livanədə əncom bıə qıləy siyosi terror be.