İron: sionist rejimi tojə şərorəti vucudədə, İroni cəvob vironəkə bəbe

İ Bıə Milləton Təşkilotədə İroni nımoyəndəti bə sionist rejimi tojə rəketi cəvobi barədə elonış kardə: ehanə sionist rejim cəvob bıdə və tojə şərorəti icod bıko, bədiqə cəvob vey vironəkə bəbe.

İron İslom Respublika ıştə hakımiyəti darıştey və şəhidon İsmoil Həniyyə, Seyd Həsən Nəsrullah, və Sepah briqada qeneral Seyd Əbbos Nilfruşan terror və de sionist rejimi vositə, Fələstin və Livani beqınohə hırdənon və jenon ğətliam kardey vədə, i devrə səbr kardey bəpeşt, de İ Bıə Milləton Təşkiloti prinsipon bərobər, ıştəniku ğanuni mıdofiyə kardeyədə bə ıştə kişvəri həxi əsos, de çand sa balestik rəket, sionist rejimi hədəf ğərorış do.

Həminə cəhətədə və bə İrna raporti əsos, Seşəmbə rujədə İron İslom Respublika nımoyəndəti qıləy bəyoniyədə təsdiğış kardə: bbə İroni İslomi Respublika milli hakımiyət təcavuz kardey və İroni mənafe və ğəyri İroni şahrvandon hədəf ğəro doeyədə sionist rejimi terroristiyə hərəkəton xoto, İroni ğanuni, mənteği və huğuği cəvob əncom bıə.

Im bəyoniyə ijən əlovəş kardə: məntəğə kişvəron və sioniston himoyədoron, ım rejimiku ıştə hicobi co bıkon.