İron iyən Şri-Lanka Xarici Koon Vəziron miyono telefonə qəp

İron İslom Respublika xarici koon vəzir Seyd Əbbos Ərağçi və Şri-Lanka xarici koon vəzir Vicitha Herat de telefoni dıtərəfinə munosibəton,reqiyonal və beynəlxalğə inkişofon barədə muzokirəon və fiki mubodilə bardəşone.

Bın sehbətədə İron İslom Respublika xarici koon vəzir,de Bəşəri Həxon Şura uzv devləton təxminən nimə tərəfiku dastək vində İnsonə Həxon Şuradə de Ğərbi çandə qılə kişfəri tərəfiku bə İroni zidd təklif doə bıə ğərəzinə ğətnomə anqıl çı Şri-Lanka hukuməti məsuliyyətinə mevğey barz qətə holədə,insonə həxon məsələku bə mıstəğilə kişfəron təzyiğ nışon doeyro bənə qıləy vositə bıə istifodəş məhkum kardə.

Şri-Lanka xarici koon vəzir həm bə kişfəron milli suverenəti hurmət və mıstəğilə kişfəron daxili koon mudaxilə ğədəğən kardey anqıl prinsipiyal mevğeyış,həmən bə de terrorizmi muborizə zəruririyyəti işorə kardə holədə,təkidış kardə ki,çəy kişfəri de İroni əloğəon hovuj kardeyro əzmış heste.

Tərəfon həmçinin bo dıqlə məmləkəti interes icod kardə sahəonədə dıtərəfinə munosibəton həni həm inkişof doeyro bə mıştərəkə səyon dəvom doey vocibəti təkidışon kardə və mıxtəlifə sahəonədə, xususən həm ixtisodi və ticorət sahəonədə dıtərəfinə həmkoəti dəvom doey və hovuj kardey,həmən beynəlxalğə təşkiloton və forumon səviyyədə məsləhəton dəvom doey təkidışon kardə.