Trampi sıxanon barədə İroni dıvləti nışo doə reaksiya.

Zinə şəv və Amerkə prezidenti be əsosə sıxanon cəvobədə İron İslam Respublika xarıci vəzarətxanə qıləy bəyoniyə sadirış kardə.

Bə İrna raporti əsos İron İslam Respublika xarıci vəzarətxanə çı Trampi beməxə sıxanon cəvobədə elanış kardə: ətom enerji beynəl xalğiyə təvafuğ diplomatiya sahədə qıləy stajış nıbıə təvafuğe ki nı çəy barədə muzakirə bəbe və nı əy əvəz karde bəbe.

Im bəyoniyədə ğeyd bıə: ətomiyə təvafuğ de Amerkə xaric bey vasitə sağit və vılo nibəbe bəlkəm çı Əmniyyət Şura ğətnoməon çərçivədəy ijən 5+1 kişvəron və beynəlxalğ  iştimaiyətə bə Amerkə prezident ım təvafuği məsxərə karde icozə nibədon.

İron İslam Respublika ım bəyoniyədə təsdiğış kardə, İron əvvəl ətomiyə təvafuğiku xaric nibəbe əmmo əqə çı İroni mənafe və həx-huğuğon rioyət məbu əmə məhdudiyəton arşiye bəpeştə ijən ətom enerji sulhinə fəaliyəton dəvom bədamon.

Im bəyoniyədə omə ki: Amerkə bəbe dəvardə 40 sori mıddətdə bıə dərson çı yodo be nıkə və oğo bıbu ki çımiku bə nav bən Amerkə ısətnə dıvləton və prezidenton həm İroni vədə jıqo be əsosə ğil-ğalon kardə bıən ki oxoy sə de peşmonəti çəyku diyəro bən.

İroni xarıci vəzarətxanə bəyoniyə dəvomədə ğeyd bıə ki: Amerkə tərəfiku təhdid və sanksiyaon dəvom peydo əkə deşmənçiyə siyasəton sayədə İroni millət ijən deştə zu və ğudrət, nizomi peştədə bəmande və istiğlol iyən ədolət tələbəti roədə bə hərəkəton dəvom dodə.

2 haftə mediyaonədə cəncoli bəpeştə, zinə şəv Amerkə prezident bo İroni ğudrəti məhdud karde xoto tojə strateqiyaon elanış kardə ijən bə İroni milləti tohin və be ehtıromətəti karde kənoədə qıləy be əsosə sıxanon çərçivədə i tərəf İroni bə ətomiyə təvafuği rioyət nıkarde mıttəhəmış kardə və co tərəf ətomiyə təvafuği çı Amerkə tarixədə vey bevəcə təvafuğ hisobış kardə.