Pars Today

İroni prezident Tehron-Moskva miyono 2 tərəfi, məntəğə iyən beynəlxalğ sahədə həmkarionış məxsusən siyasi bıhronon həl karde iyən zumandə daimiyə sulhi xoto mısbət və bə inkişofi tərəf hisobış kardə ijən muxtəlifə baxşonədə 2 qılə kişvəron miyono bə əloğəon çımiku vey inkişof doe təkidış kardə.

Həsən Ruhani zinə Soçiədə bıə İron, Rusiyə iyən Tırkiyə miyono 3 tərəfiyə iclosi kənoədə de Rusiyə prezident Veladimir Putin vindemon karde votışe: ım iclos Suriyə iyən məntəğədə bo stabilə sulhiro vey muhimmə hərəkəte.

İroni prezident əlovəş kardə: Suriyə bıhroni həl kardero İron və Rusiyə miyono həmkarion bo məntəğə co məsələon xoto bənə qıləy nımonəy.

Ruhani ijən İron və Rusiyə miyono əloğəon hevuj karde bə məntəğə iyən 2 qılə milləti aid zınəş be və bə 2 qılə kişvəri rəsmi şəxson cəhd navonə muğaviləon icra karde xoto təkidış kardə.

İroni preziden ətomiyə təvafoği barədə həm bə həmmə kişvəron tərəfo ım muğavilə icra karde xəyr işarəş kardə ijən votışe: İron hıç faxt ım təvafoği ləğv nibəkay əmmo çı rioyət nıbey xoto sukut nıbəkarde.

Putin həm Soçi iclosədə bə İroni aliyə heyəti əktivə huzur vey təşəkkurış kardə ijən votışe: Tehron-Moskva miyono 2 tərəfi həmkarion məxsusən mıştərikə mıvzon barədə çimiku vey hevuj bəbe.

Rusiyə prezident bə İron iyən Rusiyə miyoni əloğəon inkişofiro zəminəon çandə hozzo bey işarəş kardə və təsdığ kardə: Tehron-Moskva bo Suriyə siyasi bıhroni kamilən hal kardero bəbe mıştərikə cəhdon çimiku vey bıkun.

Putin ijən təkid kardə ki həmmə tərəfonku lazime çı İroni ətomiyə təvafoği icra bıkun boçi ki Moskva vindemoniku qıləy kişvər karde nibəzne ım beynəlxalğiyə mığovilə xərob bıkəy.