Cəhanqiri: de Şanxay Həmkari Təşkilat əloğə oqəteyro İron kamilən hozzoe.

İroni prezidenti i minə moavin votışe: məntəğə və dınyo təşkilaton çərçivədə həmkari karde bo həmmə kişvəronro foydəş bəbe məxsusən əvoni ki sulh, rifoh və əmniyyəti pidəşone.

Eshağ Cəhanqiri zinə Russiyə Soçi şəhrədə bıə Şanxay Həmkari Təşkilati i minə vəziron 16-nə iclosi kənoədə təkidış kardə ki İron de Şanxay Həmkari Təşkilati həmmə uzv bıə kişvəron dustiyə rabitəonış pidə votışe: İron və 5+1 qrupi miyono ətomiyə təvafuğ bo İroni məntəğəiyə şərikonro vey çokə fırsəti icodış kardə ki Şanxay Həmkari Təşkilat çəvonku qıləyni hisob bedə.

Cəhanqiri İronış çı milləton, ğomon və mədəniyəton miyono inkişof, sulh, ozavziye stabiləti mudafiə əkə sərzəmin hisobış kardə və votışe: çı Şanxay Həmkari Təşkilati jentonədə İron karde bəzne dınyoku radikalizmi məhv karde xoto səy və cəhd iyən həmkari bıkə.

Əv bə dınyoədə təhdidon və fırsəton işorəş kardə və əlovəş ka: əmniyyəti bənə qılə məhsul ticarət karde ijən terrorizmi perosniyə kəson dastiku cinoyətkoron xaric bey ısət dınyoədə silohinə mısobiğəonış hevuj kardə.

Eshağ Cəhanqiri təkidış kardə: Şanxay Həmkari Təşkilat karde bəzne çı İroni ticari çokə vırəku istifodə karde sayədə çı məntəğə muhimmə iğtisodiyə proyekton icra bekə.