Sivı həştminə Beynəlxalğ Kərimə-Ğıroni mısobiğə

Sivı həştminə Beynəlxalğ Kərimə-Ğıroni mısobiğə

Əzizə əməson səlom, şımə ruj bə xəyr bıbu, əzizon dəvardə soronku, Ğıroni təlimon və aqahətion hevujəti cəhətədə, İronədə vey hərəkəton əncom bıə, jəqo ki həmişə Ğıroni əzəmətinə onemonon şoyd hestim. Həminə cəhətədə Esfəndə manqi 9 tosə 14 minnə rujədə və de Xıdo Rəsul(s)-i besətə ruji həmzəman, Tehronədə və Ğıroni mədəniyəti rəvoc doe çərçivədə, kərimə Ğıroni 38 minnə dıvrə beynəl xalğ mısobiğəon, bərpo bıə. Im bərnomədə bə ım iclosi işorə bəkamon, dəvət kardəm de ım bərnomə dəmə bə ico bımandən.

Mehribonon, kərimə Ğıron, mısılmonon muğəddəs və osmoniyə kitobe ki bə peyğəmbər(s) vəhy bıə, və bə dini alimon nəzə əsos, ım muğəddəsə kitobi bə Ğıron nom noey illət ıme ki ım kitob həmmə elmon muğaisədə bənə komilə əsər heste.

Ğıron pərvərdıqori zıney və tovhidi kitobe ki ənbiya dəvəti ğolibədə bəyon bıə. Təğribən Ğıroniku 500 qılə ayə bə şəri hokmon və co baği ayəon bə əxloiyot, ədolət bərpo kardey, Xıdo royədə cihod kardey, insonon həx huğuğon oqətey və yande həxədə zılm nıkardey, tovsiyəonku şomil bıdə.

Ğıroni təlifəkə şəxs, Xıdovənde. Xıdo Bəğərə surə 63 minnə ayədə hamiyəşe:

" bəşməmon doə(tovrati lovhə)-ku de ğıvvəti bıqətən və bəvədə çiç heste hejo bə yod dənən(əməl bıkən) ğəsbu pərhizkor biyon."

Bə həminə ayə əsos, ilahi ayəon oqətey bəpe bə 2 qılə surət bıbu, elmi və əməli, yəni əvvəl tədəbbor və nığılə famemon, və peşo bə təlimon və əmron komil və səhih surəti əməl kardey.

Torixədə ım məsələ sobit bıə ki hiç qılə kitob ni ki bənə Ğıroni bə ictima və insoni jimon təsiron bınə. Ğıron, mısılmonon fik, imon və diniro qıləy əsli və əsosiyə mehvəre, bo çimi xotoe ki çəy umutey və zıney muminon və har insoniro vacib və lozime.

Əqə Ğıroni səhih və dırıst bıznəmon, bə Həzrəte Əli(ə)-i nəzə əsos "Ğıron, sıxənon miyonədə vey çokin, dılonro bəhor, sinəonro şəfo və həmmə elmonro qıləy çəşməy və koon nəzm və sə-saman doe sivəy."

Əmmo Ğıron və dini nəşr doey cəhətədə, Ğıroni ğarion və ustadon miyono mısobiğəon bərpo kardey, hokmən çı solimə mısobiğəon bois bəbe.

Əzizon, İronədə (kərimə Ğıroni beynəl xalğ mısobiğəon) həminə mısobiğəonku qıləyni bə hisob omeydə ki çəy 38 minnə dıvrə, Tehronədə və de 29 qılə dınyo kişvəronku 62 qılə ğari virtual iştiroki bərpo bıə. Im mərosim bino beyədə, vəlie fəğih nımoyəndə, Mehdi Xamuşi votışe: “ım mısobiğəon vey yolə Ğıroni mısobiğəonku bə hisob omeydə ki 3 qılə baxşədə bənə kərimə Ğıroni ğeraət, tərtil və hifz əncom bıə. Kərimə Ğıroni məğom və vırə bənə jimoni kitobi yol qəte, kərimə Ğıroni hifəkəyon və ğarion məğomi yol qətey, ictima muxtəlifə quruponədə Ğıroni hol-həvo icod kardey və islamiyə umməti miyono vəhdət icod kardey ım mısobiğəon bərpo bey muhimmə hədəfon be. Həmçınin de korona virusi pandemik şəroyeti vucudi, ım mısobiğəon bərpo bey, Ğıroni aləmi tojə jimon və şoətion pevlo kardə.”

Həmçınin ım mərosimi bino beyədə, İslamiyə irşod və mədəniyət vəzorətxonə Ğıron və itrət muavin, Əlirıza Moaf, halihaziədə Ğıroni beynəl xalğ mısobiğəon, islam dınyo vey etıborinə mısobiğəon bə hisobış vardə və votışe: " dəvardə soron Ərəbiston, Misr, Malayziya və co kişvəron mısobiğəon, Tehroniku vey eteborin bin, əmmo ımruj dınyoədə İroni mısobiğəon vey eteborış heste ki bəpe ım mısobiğə bərpoəkəyonku ğədrdonəti kəmon".

Mısobiğə kənoədə, Fil Asta Sahili kişvəri Əbican şəhri 16 sornə tələbə, So İbrahim, ki Ğıroni tilovət kardey zəmonədə vey həyəconış be, votışe: az 3 sori mıdətədə Ğıroni hifz kardəme, əqəçı çəmə kişvərədə bo Ğıroni təlim doeyro, vey islami mərkəzon heste əmmo az de çıme səyocəhdi Ğıroni hifz kardıme. əv ijən votışe: Ğıron bəpe çəmə jimonədə cari bıbu, və həmmə ləzzəon Ğıroni pənohədə və Xıdo sıxənon əməl kardey holədə bıbəmon. Çıme zıney, İron İslam Respublikaku bə İmom Xomeyni(r)-i yolə şəxsiyəti əsose ki həmmə mısılmononro bənə ulqu bə hisob omeydə.

Səmimi əməson, mərosimi oxoədə, vəlie fəğih nımoyəndə və xəyriyə koon iyən vəğf təşkilati rəis, Huccətul İslam Sed Mehdi Xamuşi bə Ğıroni ayəon çanq jey zərurət işorəş karde və votışe: (Mərhum Şeyx Horre Ameli, qıləy rəvoyətədə bəyon kardedə ki "Ğıroni yod bıqətən və yod bıdənən. Ğiyomət rujədə Ğıron vey ğəşənqə sima surəti oşko bəbe. Xıdo bə Ğıron xətob kardedə ki ıştı sə rost kə, az har çi ki dılıt heste bə tı bədom və icobət bəkam. Şəfoət bıkə, ıştı şəfoət ğəbul bəbe. Çıme bandəon çoknə vindəş? Həmonə zəmone ki Ğıron har bandə vədə ğəror bəqəte və ə şəxsi barədə voteydə: çıme pərvərdıqor, məhşəri daştədə, kali ım məhşor bıə kəson həmonə insononin ki mıni oqətəşone və mıku hiçi zay nıkardəşone. Kali ım şəxson həm mıni zay kardeşone və bəmı du basteşone" peşo Xıdovənd bə Ğıron hamiyədə: "bə çıme cəlol, izzət və çıme barzə məğomi ğəssəm, deştı vositə vey çokə mokafaton bədom həmçınin deştı vositə vey bevəcə əzobon bə bandəon bədom."  Diğğət bıkənən ki Xıdo sıxən vəhy heste və Xıdo pidəşe de Ğıroni vositə, əməni dınyoku bə səadət və ilahiyə hidoyət bırosno. Beşək əqə vəhy bıə nıbe, əmə həmmə cəhlədə mandeydə bimon.)

Mehribonon, korona virusi xususi şəroyetədə kərimə Ğıroni ım dıvrə mısobiğəon bərpo bey nışo doydə ki bəşər de ıştə həmmə ıştə zəefətion bə ico, fəğət de məenəviyoti vositə, karde bəzne səadəti roy peydo ko.

Həmçınin Im dıvrədə, ğıroni tilovəton keyfiyət vey barz be ki bəpe ım məsələ sitoyeş kəmon və bərpoəkəyon səyocəhd ım be ki dınyoədə xususi İronədə və cıvonon iyən nocıvonon miyonədə, diğğət, rabitə, unsiyət və fəhmi zəminə icod bıbu ta "Ğıroni vahidə umməti " təşkil kəmon.

İslamiyə irşod və mədəniyəti vəzir, Muhəmməd Məhdi İsmaili ım mısobiğəon oxoədə bəyon kardeşe: islamiyə inğilobi səbarzəti və ım muğəddəsə nizomi icod beyədə, Ğıroni əməliyə hədəfon, bəşər jimonədə oşko heste. əv bə ım dıvrə Ğıroni mısobiğəon şuari ki "i kitob, i ummət" be işorəş karde və votışe: əqə ıştəni bə Ğıroni Həblolmətin və Orvətolvosğa anqıl bıjənəmon, qıləy yolə umməti soyb bəbemon, islamiyə inğilob, islamiyə umməti fiki bə vırə roniyəşe və bəpe həminə roy idomə bıdəmon və fəğət bə Ğıron çanq bıjənəmon.

Əzizə əməson bə ım bərnomə quş doe xoto şıməku təşəkkur kardm.Dəvət kardəm bə co bərnoməon həm quş bıdənən.